तस्करी नरोकिएपछि बाराका एसपी सिंह फेरि तानिए

काठमाडौं । सशस्त्र प्रहरी मुख्यालयले बारास्थित १२ नं गणका गणपति (एसपी) सन्तोषबहादुर सिंहलाई छानबिनका लागि तानेको छ ।

बीरगंज भन्सार कार्यालयका प्रमुख भन्सार प्रशासक दीपक लामिछाने र बाराका प्रमुख जिल्ला अधिकारी बसन्त अधिकारीले सीमा क्षेत्रको निरीक्षणका क्रममा बाराबाट भन्सारछलीका सामान ब्यापक भित्रने गरेकोबारेमा सशस्त्र मुख्यालयललाई जानकारी गराएपछि एसपी सिंह तानिएको स्रोत बताउँछ ।

स्रोतका अनुसार सशस्त्र प्रहरी बल नं १२ गणमातहतका प्रस्तावित गुल्म, बेस र बीओपीले तस्करी नियन्त्रणमा उदासिनता देखाएको बिषयमा भन्सारको रिपोर्टिङपछि एसपीलाई छानबिनका लागि मुख्यालयमा तानिएको छ । एसपी सिंहलाई गणपतिको जिम्मेवारी दिएर आउनू भनेपछि उनले सिनियर डीएसपी रविन सिलवाललाई निमित्त दिएका थिए ।सिलवालले पनि तत्कालै अर्का डीएसपी विक्रम पौडेललाई निमित्त दिएर बिदा लिएका छन् ।

यसअघि मंसिर अन्तिममा सशस्त्र प्रहरी बल ८ नम्बर गण धनुषाका एसपी दर्शन गिरी, मोरङका विश्व खड्का, बाँकेका बिमल डाँगीसहित बाराका सन्तोषबहादुर सिंह पनि तानिएका थिए । छानबिनका लागि तानिएका उनीहरु पुस अन्तिम साता फिर्ता भएका थिए । तर बाराका एसपी सिंह भने फेरि तानिएका छन् । बाराका पिपरपाती, मटिअर्वा गुल्मका गुल्मपति पनि तानिएकोमा उनीहरुलाई समेत फिर्ता पठाइएको थियो ।