विपक्षी दलको संयुक्त पत्रकार सम्मेलन शुक्रबारका लागि सर्यो

काठमाडौं – विपक्षी दलहरूले आज गर्ने भनिएको पत्रकार सम्मेलन स्थगित भएको छ । हिजो बसेको विपक्षी दलको संयुक्त बैठकले आज पत्रकार सम्मेलन गर्ने निर्णय गरेको थियो ।

तर, कार्यदलले ड्राफ्टलाई अन्तिमरूप दिन बाँकी रहेकाले आजका लागि तय भएको सम्मेलन स्थगित भएको हो । आजका लागि तय भएको पत्रकार सम्मेलन भोलि दिउँसो ३ बजेका लागि सारिएको नेसपाका अध्यक्ष महिन्द्र राय यादवले जानकारी दिए ।

विपक्षी दलको हिजोको बैठकले वर्षमान पुन र नेकपा एकीकृत समाजवादीका नेता बेदुराम भुसाल सम्मिलित २ सदस्यीय कार्यदल बनाएर विपक्षीहरूको साझा धारणाको ड्राफ्ट तयार गर्ने जिम्मेवारी दिएको थियो । यो कार्यदलले ड्राफ्ट तयार गर्न समय लगाएपछि आजको पत्रकार सम्मेलन स्थगित भएको हो ।