एनपीएलमा जनकपुरको लगातार तेस्रो जित, पोखरा ७ विकेटले पराजित

काठमाडौं – नेपाल प्रिमियर लिगमा पोखरा एभेन्जर्सले लगातार दोस्रो हार व्यहोर्दा जनकपुरले भने लगातार तेस्रो जित निकालेको छ।

आज (बिहीबार) भएका पहिलो खेलमा जनकपुरले पोखरालाई ७ विकेटले पराजित गरेको हो। एनपीएलको तीन खेलमा अपराजित जनकपुर ६ अंकमा तालिकाको शीर्ष स्थानमा छ।

जनकपुरले पहिलो खेलमा विराटनगर किंग्सलाई ८ विकेटले हराएको थियो। दोस्रो खेलमा भने कर्णाली याक्सलाई ८ विकेटले नै हराएको थियो। पोखरा भने पहिलो खेलमा चितवन राइनोजसँग ८७ रनले पराजित भएको थियो।

पोखराले दिएको १ सय ३९ रनको लक्ष्य जनकपुरले १७।१ ओभरमा ३ विकेटको क्षतिमा भेट्टायो।

त्यसअघि कीर्तिपुरस्थित त्रिवि क्रिकेट मैदानमा जनकपुरले टस जितेर फिल्डिङ रोजेपछि ब्याटिङ गरेको पोखराले निर्धारित २० ओभरमा ७ विकेटको क्षतिमा १ सय ३ रनको योगफल तयार पारेको थियो।

आजै हुने दोस्रो खेलमा सुदुरपश्चिम रोयल्स र काठमाडौं गुर्खाज भिड्दै छन्। सो खेल दिउँसो १ बजे सुरु हुनेछ।