एसएसपी सरुवाको तयारी, काठमाडौं, ललितपुर र उपत्यका अपराधमा चर्को प्रतिस्पर्धा

काठमाडौं । गृहमन्त्रालयले नेपाल प्रहरीका केही एसएसपीको सरुवा तयारी गरेको छ । गृहले जिल्ला प्रहरी परिसर काठमाडौं, ललितपुर र काठमाडौं उपत्यका अपराध अनुसन्धान कार्यालय लगायतका केही एसएसपीको सरुवा गर्न लागेको हो ।

काठमाडौं परिसरका प्रमुख बसन्त रजौरे र काठमाडौं उपत्यका अपराध अनुसन्धान कार्यालयका एसएसपी सानुराम भट्टराईको ७ महिना पूरा हुन बाँकी छ । ललितपुरका एसएसपी शेखर खनालको १० महिना पुगेको छ ।

गृहमन्त्रालयले सरुवाको तयारी गरेपछि काठमाडौैं, ललितपुर परिसरदेखि उपत्यका अपराधको प्रमुखका लागि शक्तिकेन्द्रमा एसएसपीहरुको चर्को दौडधूप सुरु भएको छ । काठमाडौं परिसरको एसएसपीको लागि सबैभन्दा बढी दौडधूप चलेको छ ।

काठमाडौं परिसरका लागि एसएसपीद्वय विश्व अधिकारी र सोमेन्द्रसिंह राठौर लागेका छन् । राठौरले परराष्ट मन्त्री डा. आरजु राणामार्फत् काठमाडौं परिसरमा सरुवा हुने चलखेलमा लागेका छन् । यसअघि काठमाडौं उपत्यका अपराध अनुसन्धान कार्यालयको प्रमुख भइसकेका राठौरलाई काठमाडौं परिसरका प्रमुखमा सरुवा गर्ने पक्षमा गृहमन्त्री रमेश लेखक र आईजीपी बसन्तबहादुर कुँवर छैनन् ।

गृहमन्त्री लेखक विश्व अधिकारीलाई काठमाडौंको एसएसपी बनाउने पक्षमा छन् । कांग्रेस उपसभापति पूर्णबहादुर खड्का समेत अधिकारीकै पक्षमा रहेका छन् । राठौर र अधिकारीको पक्षमा शक्तिकेन्द्रको टक्करले रमेश बस्नेत र श्यामकृष्ण अधिकारीले बाजी मार्ने संभावना पनि रहेको छ ।

काठमाडौंपछि ललितपुर परिसरको प्रमुखमा तारादेवी थापा, भीमबहादुर दाहाल, नान्तिराज गुरुङको चर्चा छ । यद्यपि यो सरकार गठनको लागि प्रारुप तयार गर्ने बैठक घरमै राख्ने रामेश्वर थापाकी भाइबुहारी भएकाले थापाकै पल्ला भारी भएको स्रोत बताउँछ ।