काठमाडौं । देशभर लक्षण भएका कोरोना संक्रमितको संख्या बढेसँगै आइसियुमा र भेन्टिलेटरमा उपचार गर्नेको संख्या पनि बढ्न थालेको छ।
स्वास्थ्य तथा जनसंख्या मन्त्रालयका अनुसार देशभर ४ सय ४२ सय जना कोरोना संक्रमित विभिन्न अस्पतालको आइसियु र भेन्टिलेटरमा उपचाररत छन्।
मन्त्रालयको तथ्यांक अनुसार ६२ जना भेन्टिलेटरमा र ३ सय ८० जना संक्रमित आइसियुमा उपचाररत रहेका छन्।
आइसियुमा रहेका संक्रमितको संख्या सबैभन्दा बढी बागमती प्रदेशमा १६१ जना आइसियु र ३८ जना भेन्टिलेटर, लुम्बिनी प्रदेशमा ५५ जना आइसियु र ५ जना भेन्टिलेटरमा, प्रदेश १ मा ४८ जना आइसियु र ३ जना भेन्टिलेटरमा र प्रदेश २ मा ११ आइसियु र १ जना भेन्टिलेटरमा उपचाररत रहेको मन्त्रालयले जनाएको छ।
त्यस्तै सुदुरपश्चिममा ६ आइसियु र १ जना भेन्टिलेटरमा, गण्डकी प्रदेशमा ८९ आइसियु र १४ जना भेन्टिलेटरमा र कर्णाली प्रदेशमा १० आइसियु उपचाररत रहेका छन्।
यसभन्दा अघि बुधबार ३ सय ८०, मंगलबार ३ सय ५६ जना मानिस आइसियु र भेन्टिलेरमा उपचारत रहेका थिए।
नेपालमा २ लाख १५ हजार २० जना मानिस कोरोना भाइरसबाट संक्रमित भएका छन्। जसमध्ये १ लाख ८५ हजार ६ सय ३८ जना निको भएर घर फर्किसकेका छन् भने १ हजार २ सय ७६ जनाको मृत्यु भएको छ।
