जनकपुर । धनुषामा कोरोना संक्रमणबाट ७० वर्षीय वडाध्यक्षको मृत्यु भएको छ । धनुषाधाम नगरपालिका ६ का वडाध्यक्ष बन्देबहादुर मोक्तानको बिहीबार जनकपुरस्थित प्रादेशिक अस्पतालको आइसोलेसनमा उपचारका क्रममा मृत्यु भएको हो ।
सोमबार ज्वरो आएपछि पुष्पवलपुरस्थित स्वास्थ्य क्लिनिकमा उपचार गराएका थिए । शारीरिक अवस्था कमजोर हुँदै गएपछि मंगलबार प्रादेशिक अस्पतालमा भर्ना भए । त्यहाँ स्वाब संकलन गरी जाँच गर्दा कोरोना संक्रमित देखिएको र शरीरमा अक्सिजन कम हुँदै गएपछि आइसोलेसनमा राखेर उपचारका क्रममा बिहीबार मृत्यु भएको बताइएको छ ।
पूर्वएमालेबाट वडा अध्यक्षमा निर्वाचित मोक्तानको मृत्युपछि नेपाली सेनाको टोलीले स्वास्थ्य सुरक्षाको विधि पालना गरी अन्त्येष्टि गर्ने तयारी भैरहेको छ ।
