डा.बाबुराम भट्टराईलाई पीएले पनि छाडे

काठमाडौं । माओवादी केन्द्र छाडेर नयाँशक्ति हुँदै उपेन्द्र यादवको जसपा र त्यसपछि नेपाल समाजवादी पार्टी खोलेका डा. बाबुराम भट्टराईका दुई सांसदले त छाडे छाडे, पीएले समेत छाडेका छन् ।

बाबुरामलाई २० बर्षदेखि सचिवालयमा बसेर साथ दिएका विश्वदीप पाण्डेले सोमबार माओवादी केन्द्रमा फर्किएका छन् ।  पाण्डे समाजवादी पार्टीका केन्द्रीय सदस्य हुन् ।

डा. भट्टराईका पीए विश्वदीप पाण्डे समाजवादी पार्टी छाडेर नेकपा माओवादीमै फर्किएका छन् । उनका पिता स्व. भक्ति पाण्डे पनि डा. बाबुरामकै अनुयायी थिए ।

माओवादी फर्किनुपर्नाको कारण खुलाउँदै पाण्डेले लेखेका छन्–‘केही बर्षको उतारचढाव,आफ्नै प्रकारका भोगाई र अनुभूतिसँगै म नेकपा माओवादी केन्द्रमै फर्किएको छु । माओवादी पार्टी र अध्यक्ष कमरेड प्रचण्डसँगको सहकार्य मेरा लागि कुनै नयाँ कुरा हैन । यहाँ मेरा लागि पहिलेकै जस्तो प्रेम, स्नेह र सद्भाव छ भन्ने पूर्ण विश्वास छ ।

सुशासन, समृद्धि, सामाजिक न्याय र समाजवादको यात्रा टुटेर, फुटेर अथवा छुट्टाछुट्टै हिँडेर पूरा गर्न नसकिने रहेछ । आज देशलाई वामपन्थी शक्तिबीच नयाँस्तरको एकता र सहकार्य चाहिएको छ । अझ हिजोका क्रान्तिकारी शक्तिहरु सबै प्रकारका पूर्वाग्रहबाट माथि उठेर एकताबद्व हुनु झनै आवश्यक छ ।

यो क्षण म केही भावुक पनि भएको छु । कतिपय पुराना र पेचिला स्मरण जीवन्त भएर आएका छन् । यो पार्टी र आन्दोलनको निर्माणमा मेरो बुबाको सम्पूर्ण जीवन नै समर्पित भयो । म आफूले यसमा सक्दो भूमिका र योगदान गरेँ । कतिपय राजनीतिक घटनाक्रमको जटिलताले हामी केही टाढा–नजिक भयौं होला तर, भविष्यका नयाँ चुनौती पूरा गर्न यो पार्टी र आन्दोलनलाई नयाँ स्तर र उचाईमा उठाउन योगदान गर्नुपर्छ भन्ने निष्कर्षमा पुगेर फेरि यात्रामा लामवद्ध भएको छु ।’