वन प्राविधिक संघको चुनावः नो भोटको पक्षमा १०३ जनाको समर्थन

काठमाडौं । देशको मूल मानिने राजनीतिक क्षेत्र नै सङ्लो नभएको अवस्थामा पेशागत संघ संगठनमा पनि त्यसको असर पर्छ नै । हरेक पेशागत संघ संगठनमा दलीय हस्तक्षेप बढिरहेको छ । राजनीतिक क्षेत्रमा नो भोटको प्रावधान नभएकाले नागरिक जति निराश भए पनि मत दिनैपर्ने बाध्यता छ । तर शनिबार भएको नेपाल बन प्राविधिक संघको चुनावमा नो भोटको ब्यवस्था गरिएको थियो । जहाँ उल्लेख्य संख्यामा वन प्राविधिकहरुले नो भोट गरेका छन् ।

वन प्राविधिक संघको निर्वाचनामा जम्मा २ हजार २ सय ३२ भोट खसेकोमा २ हजार १ सय २९ भोट उम्मेदवारलाई परेको थियो भने १ सय ३ जना वन प्राविधिकले नो भोट गरेका थिए ।
संघको अध्यक्ष पदमा राकेश कर्ण बिजयी भएका थिए । पेशागत संघ संगठनको नेतृत्व गरिसकेका वन प्राविधिक महादीप पोखरेलले नो भोटको पक्षमा अभियान चलाएका थिए ।

नो भोट अभियान चलाउँदै आएका पोखरेलले संघको निर्वाचनमा निम्न सवालहरु उठाएका थिए–‘मुख्य कुरा हाम्रो प्राकृतिक स्रोत र साधनमाथि नववदारबादले कब्जा जमाउने सुरसार छ र यी बहुराष्ट्रिय कम्पनी मार्फत् आइरहेका छन् । विश्व बैंक त्यसको संरक्षक हो ।

विश्वभर फैलिएको यो दुष्टचक्रलाई पर्दाफास नगरिकन हाम्रो बन–खनिज र जलश्रोतबाट आशातित लाभ देशले लिन सक्दैन ।
यो बिषयमा नेपालका राजनीतिक नेतृत्वहरु असफलमात्र होइन ,नवउदारवादकै पिछलग्गु बनेका छ्न । यस्मा सबै राजनीतिक पार्टीहरु उस्तैउस्तै हुन् । अनि हामी बन,बाताबरण क्षेत्रका मान्छेहरुले इमानदारीपूर्वक हस्तक्षेप र फिडब्याक दिन जरुरी छ ।

यदि हामी अहिलेको स्थितिमा पार्टीगत राजनीतिलाई प्रश्रय दिइरहँदा हाम्रो आलोचनात्मक र सृजनात्मक चेंत मरेको छ । मेरो मुख्य चिन्ता यही हो, बांँकी सबै जान्ने बुझ्ने नै हुनुहुन्छ ।’
नो भोटको पक्षमा अभियान चलाउने क्रममा यति ठूलो संख्यामा प्राविधिकहरुले समर्थन जनाउने आशा पोखरेलले नगरेको बताउँदै लेखेका छन्, १ सय ३ जनाले नो भोट गर्नु ऐतिहासिक हो, नैतिक बिजय भएको महसुस भएको छ ।