सचिव सरुवामा दूताबासको दबाब, मन्त्री पुनको चाहनाबिपरीत पुस्करको थमौती ?

काठमाडौं । सरकारले १३ सचिवको सरुवा गर्दा सबैभन्दा अक्षम अर्थमन्त्रालयका कृष्णहरि पुस्कर कर्णको नाम सूचीमा थियो । तर सरुवामा उनी नअटाएपछि उनी कसरी थमौती भन्ने खोजी सुरु भएको छ । बर्षमान पुनले अर्थमन्त्रालय सम्हालेलगत्तै ब्रिफिङ नै नगरी अमेरिका उडेपछि पुस्कर र मन्त्रीबीचको सम्बन्ध झन् चिसिएको थियो ।

राजस्व सचिवको रुपमा डा. रामप्रसाद घिमिरेले कर्णको तर्फबाट पनि मन्त्रीलाई ब्रिफिङ गरेका थिए । मन्त्री पुनले पार्टी मुख्यालयदेखि प्रधानमन्त्रीसम्मलाई अर्थमा आफ्नो रोजाइका सचिव ल्याएरै छाड्ने बताएका थिए । धेरैले अर्जुनप्रसाद पोखरेल वा रामप्रसाद घिमिरेमध्ये अर्थसचिव हुने अनुमान गरेका थिए । तर सोमबार सार्वजनिक भएको सरुवामा पुस्करको थमौती भएपछि सबै अड्कलबाजी झुटो साबित भएको छ ।

पोखरेलले अर्थ नपाए उद्योग वा संघीय मामिला तथा सामान्य पाउने चर्चा थियो । तर उनी यो लटको सरुवामा पनि प्रधानमन्त्री कार्यालयमै थन्किन बाध्य भएका छन् । कर्ण माओवादी नेता जनार्दन शर्मानिकट मानिन्छन् । शर्माले नै प्रधानमन्त्री पुष्पकमल दाहाल प्रचण्डलाई दबाब दिएर सरुवा हुनबाट जोगाएको बताइन्छ । स्रोत भन्छ, बजेटसम्म पुस्करलाई राख्ने र त्यसपछि पोखरेल वा घिमिरेलाई अर्थसचिवका रुपमा भित्र्याउने प्रधानमन्त्री र अर्थमन्त्रीबीच भित्री सहमति भएको बताइन्छ ।

अर्थतन्त्र थला परेको सवेदनशील घडीमा अर्थको कुनै जानकारी नै नभएका र हल्काफूल्का स्वभावका पुस्करलाई त्यहीँ राखेर सरकारले अर्थतन्त्र सुधार गर्न नगर्ने संकेत देखाइरहेको छ । सेयरबजारले देखाएको रातो झन्डाले पनि अर्थमन्त्रालयको नेतृत्व असफल छ भन्ने संकेत गर्दछ । बजेट तयारीको पूर्वसन्ध्यामा अर्थमन्त्री फेर्न तयार हुने प्रधानमन्त्रीले सचिव सरुवामा भने त्यही बहाना बनाएर थमौती गर्नुले अनेक प्रश्न खडा गरेको छ ।

पार्टी नेता तथा पूर्वअर्थमन्त्री जनार्दन शर्मामात्र होइन, कृष्णहरिले थमौतीका लागि मित्रराष्ट्र भारतीय दूताबासका अधिकारी र केही नेताहरुमार्फत् दबाब प्रधानमन्त्री र अर्थमन्त्रीलाई दिएको जानकारहरु बताउँछन् । क्षमताले भन्दा पनि दबाब र प्रभावकै भरमा थमौतीमा परेका पुस्करले केही ब्यापारीसमेत थमौतीमा प्रयोग गरेका थिए ।

त्यस्तै, सरुवाको चर्चामा रहेका संघीय मामिला तथा सामान्य प्रशासन मन्त्रालयका सचिव विनोदप्रकाश सिंह पनि थमौती भएका छन् । कर्मचारी सरुवा र स्थनीय निकायका प्रमुख प्रशासकीय अधिकृत तोक्ने सवालमा ठूलो आर्थिक चलखेल गरेका उनले भेगीय आधारमा मन्त्री भानुभक्त जोशीसँग रुवाबासी गरी टिक्न सफल भएका छन् ।

रक्षा मन्त्रालयका सचिव किरणराज शर्मा र संस्कृति, पर्यटन तथा नागरिक उड्डयन मन्त्रालयका दीपक काफ्ले र सबैका प्रिय शिक्षा सचिव सुरेश अधिकारी आ आफनो शक्ति प्रयोग गरी टिक्न सफल भएका छन् । ठूलो लटमा सचिव सरुवा गरेको सरकारले अब सहसचिवहरुको सरुवा तयारी गरेको छ ।