एसपी बढुवामा गृहमन्त्री लामिछाने निरीह, भीभीआईपीका पीएसओकै बर्चस्व

काठमाडौं । लामो समयपछि भएको एसपी बढुवा विवादमा परेको छ । गृहमन्त्रालयको पदभार सम्हालेपछि प्रहरी मुख्यालयको निरीक्षणमा जाँदा सरुवा बढुवामा नेताका घर धाउनु नपर्ने गरी सुधार गर्छु भनेर भाषण गरेका गृहमन्त्री लामिछानेको बोली र ब्यवहारमा फरक देखिएको छ । नेपाल प्रहरीले बुधबार राति निकालेको ८ एसपीको बढुवा सिफारिसमा बरिष्ठहरुलाई छुटाएर नेता र शासकका पीएसओहरुलाई परेका छन् ।

डीएसपीबाट एसपी बढुवा सिफारिसमा पहिलो वरियताका प्रदीप क्षेत्री परेनन् । त्यसैगरी बरिष्ठताका आधारमा बढुवा सिफारिसमा पर्नुपर्ने नारायण रंजितकार, अनन्त शर्मा र एकनाराण कोइराला पनि छुटाइएका छन् । तर १२ औं नम्बरका विनोद शर्मा बढुवा सिफारिस भएका छन् । उनी प्रधानमन्त्री पुष्पकमल दाहाल प्रचण्डका पूर्व पीएसओ हुन् । उनकै कारण डीएसपीबाट एसपी बढुवामा बिलम्ब हुँदैआएको थियो ।

एसपी बढुवा सिफारिसमा पूर्वप्रधानमन्त्री केपी शर्मा ओलीका पीएसओ बसेका सन्तोष तामाङ र राजन लिम्बु पनि परेका छन् ।

६ महिनाअघि हुनुपर्ने एसपी बढुवा नारायणकाजी श्रेष्ठ गृहमन्त्री हुँदा नै गर्नुपर्नेमा सुशान कमाचार्यले लिलाम बढाबढ गर्नाले बिलम्ब भई सत्ता समीकरण फेरिएपछि भएको थियो ।

रवि लामिछाने गृहमन्त्री भएपछि प्रहरी मुख्यालयमा बोले अनुसार नै निष्पक्षतापूर्वक बढुवा गर्ने अपेक्षा गरेकाहरु एसपी बढुवा देखेर उनी पनि कानै चिरेका …रहेछन् भन्ने टिप्पणी गर्न थालेका छन् । विगतमा नारायणकाजी श्रेष्ठ गृहमन्त्री हुँदा ४६ इन्स्पेक्टरलाई डीएसपी बढुवा गर्दा १० औं नम्बरभित्रका बरिष्ठ र काबिललाई नगरी सय भन्दा पछिल्लो वरियताकालाई चलखेलमा गरिएको आरोप लागेको थियो ।

अहिलेको एसपी बढुवामा पनि सुधारका चर्का कुरा गर्ने गृहमन्त्रीले न्याय दिलाउन नसकेको अनुभूति प्रहरीमा गरिएको छ ।

बुधबार राति बढुवा समितिले ढकेन्द्र खतिवडा, अंगुर जिसी, यादब ढकाल, सन्तोष तामाङ, श्यामबाबु ओलीया, निरञ्जन दत्त भट्ट, राजन लिम्बु र बिनोद घिमिरेको बढुवा सिफारिस गरेको हो ।