चितवनको जलवीरेमा बस दुर्घटना, १ को मृत्यु, ४ घाइते

नारायणगढ । चितवनको इच्छाकामनामा सवारी दुर्घटना हुँदा १ जनाको मृत्यु भएको छ । दुर्घटनामा परी ४ जना घाइते भएका छन् । मृत्यु हुनेमा भारतको मोतिहारी चम्पारणका ३७ वर्षीय गौरी दास रहेका छन् । दुर्घटनामा परी घाइते भएका उनको उपचारका लागि भरतपुरतर्फ लैजाँदै गर्दा बाटोमै मृत्यु भएको प्रहरीले जनाएको छ ।

जिल्ला प्रहरी कार्यालय चितवनका अनुसार रौतहटको गौरबाट पोखरातर्फ जाँदै गरेको ग १ ख ८५२५ नम्बरको बस इच्छाकामना–६ जलविरेस्थित नारायणगढ–मुग्लिङ सडक खण्डमा चक्का पञ्चर भई बाटो छेउमा रोकी राखेको ना ६ ख ३२८० नम्बरको ट्रकलाई ठक्कर दिँदा दुर्घटना भएको थियो ।

दुर्घटनामा परी ट्रक चालक वीरगञ्ज–२३ बस्ने ३३ वर्षीय हाकिम मियाँको टाउकोमा चोट लागेको छ भने र भारतको विहार राज्य मजापुर जिल्ला बस्ने ३९ वर्षीया रिता गुप्ताको मुखमा चोट लागेको छ । दुबैजनाको चितवन मेडिकल कलेजमा उपचार भइरहेको छ ।