अखिल(समाजवादी)को केन्द्रिय समितिमा मुगुका बाल्केस सी चयन

काठमाडौं । नेत्र विक्रम चन्द ‘विप्लव’ नेतृत्वको नेकपाको विद्यार्थी संगठन अखिल  (समाजवादी ) को केन्द्रिय सदस्यमा मुगुबाट बाल्केस सी चयन भएका छन् । समाजवादीको २३औं राष्ट्रिय सम्मेलनले बाल्केसलाई केन्द्रिय सदस्यमा चयन गरेको हाे ।

उक्त सम्मेलन गत फागुन ६ गते हजारौं विद्यार्थीको उपस्थितिमा काठमाडौको वाल्मीकि क्याम्पसको प्राङ्गणमा नेकपा महासचिव विप्लव सीले उद्घाटन गरेका थिए । लामो समय विद्यार्थी राजनीतिमा सक्रिय हुँदै आएका बाल्केस मुगु बाट पहिलो पटक विद्यार्थीको केन्द्रिय राजनीतिमा प्रवेश गर्ने अवसर पाएका हुन् ।

फागुन ६ गतेदेखि ९ गतेसम्म चलेको २३औं राष्ट्रिय सम्मेलनले आफ्नो नाम पनि परिवर्तन गरेको छ । अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी ) को सट्टा अखिल नेपाल विद्यार्थी युनियन (समाजवादी) बनाइएको हाे । नयाँ नेतृत्वमा अध्यक्षमा नरेन्द्र सी,उपाध्यक्ष ललित सी, महासचिव प्रकाश सी लगायत १८१ जनाको केन्द्रिय समिति चयन गरेको छ।