जनमतले गर्यो मधेश प्रदेशसभा बैठक अवरोध, मन्त्री कुटिएकोमा मुख्यमन्त्रीले क्षमा माग्नुपर्ने अडान

जनकपुरधाम । मधेस प्रदेशका मुख्यमन्त्री सरोजकुमार यादवले विश्वासको मत लिन बोलाइएको प्रदेशसभा बैठक जनमत पार्टीले भने अवरुद्ध गरेको छ ।

तत्कालीन मन्त्री महेशप्रसाद यादवमाथि सांघातिक हमला भएकाले मुख्यमन्त्री यादवले क्षमा माग्नुपर्छ भन्दै जनमतका सांसदहरूले सदन अवरुद्ध गरेका हुन् । सभामुख रामचन्द्र मण्डल प्रदेशसभाको बैठक सञ्चालन गर्नै लाग्दा जनमतका सांसदहरू उभिएका छन् ।

सभामुख मण्डलले आज मुख्यमन्त्री विश्वासको मत लिने भन्दै बस्नका लागि जनमतका सांसदहरूलाई आग्रह गरे । तर, अवरोध कायमै रहेपछि १० मिनेटका लागि स्थगित गरिएको छ ।

जनमतका सांसद चन्दन सिंहले भने, ‘सप्तरीको राजविराजमा कृषि विश्वविद्यालय भवनको शिलान्यास समारोहमा क्याविनेट मन्त्री विश्वविद्यालयका उपकुलपति समेत रहेका महेशप्रसाद यादवमाथि सांघातिक हमला भयो । यस विषयमा मुख्यमन्त्रीले जवाफ दिनुपर्छ । मुख्यमन्त्रीले क्षमा माग्नुपर्छ ।’

जनमतको अवरोधपछि बैठक स्थगित गरेर छलफल सुरू गरिएको छ ।