संसद् चल्दा काठमाडौं नछाड्न सांसदहरुलाई कांग्रेसको निर्देशन

काठमाडौं । नेपाली कांग्रेसले संसद् बैठक चलेका बेला काठमाडौं उपत्यका नछाड्न पार्टीका सांसदहरुलाई निर्देशन दिएको छ ।

आज बसेको सो पार्टीको संसदीय दलको बैठकले यस्तो निर्देशन दिएको नेता रमेश लेखकले जानकारी दिए । साथै कांग्रेसले संसद् र संसदीय समितिको बैठकमा अनिवार्य उपस्थित हुन पनि निर्देशन दिएको छ ।

सदनको अधिवेशन चल्दासम्म कांग्रेस सांसदले राजधानी छाड्न नपाउने जानैपरे प्रमुख सचेतक र सचेतकबाट लिखित अनुमति लिएर छाड्नुपर्ने निर्देशन दिइएको पनि लेखकले बताए ।

उनले भने, ‘संसद र संसदीय समितिमा गणपूरक नपुगिरहेकाले समिति र सदनमा मन्त्री अनिवार्य उपस्थित भएर सांसदका कुरा सुन्न भनिएको छ । सांसदहरूलाई पनि सदनको अधिवेशन चल्दासम्म कांग्रेस सांसदले राजधानी नछाड्ने । प्रमुख सचेतक र सचेतकबाट लिखित रूपमा अनुमति लिएर छाड्नुपर्ने निर्देश गरिएको छ ।’