बीपी प्रतिष्ठानका उपकुलपतिमाथि कालोमोसो दल्न खोज्ने तीन जना पक्राउ

काठमाडौँ। धरानस्थित बीपी कोइराला स्वास्थ्य विज्ञान प्रतिष्ठानका कायममुकायम उपकुलपति प्रा.डा. प्रह्लाद कार्की लगायत चार जना पदाधिकारीलाई दुर्व्यवहार गर्ने अर्थात् कालोमोसो दल्न खोज्ने तीन जनालाई इलाका प्रहरी कार्यालय धरानले नियन्त्रणमा लिएको छ।

उक्त घटनामा भीमबहादुर सार्की, शेरबहादुर कटुवाल र खेमबहादुर थापालाई नियन्त्रणमा लिई अनुसन्धान थालिएको जिल्ला प्रहरी कार्यालय सुनसरीका प्रवक्ता तथा प्रहरी नायब उपरीक्षक नवीनकृष्ण भण्डारीले बताए । उनीहरू मोहन वैद्य नेतृत्वको क्रान्तिकारी कम्युनिस्ट पार्टीका कार्यकर्ता भएको खुलेको छ।

प्रा.डा. कार्कीले नै आज करीब साढे ११ बजेतिर सार्की, कटुवाल र थापालाई भेटन बोलाएका थिए। कार्कीको कार्यकक्षमा पुग्ने बित्तिकै उनीहरूले प्लास्टिकको बोतलमा रहेको मोबिल प्रहार गरेका थिए। तर, प्रहरी सहायक निरीक्षक कृष्ण भट्टराईले छेकेपछि उनीहरूले मोबिल दल्न नपाएको प्रहरीले बताएको छ।