काठमाडौं । पशुपतिनाथ मन्दिरका भण्डारी केदारनाथ भण्डारी पक्राउ परेका छन्। महानगरीय प्रहरी परिषद् काठमाडौंले उनलाई प्रकाउ गरेको हो। उनलाई सामाजिक सञ्जालमा गालीगलौज गरेको अभियोगमा पक्राउ गरिएको बताइएको छ ।
प्रहरीले भण्डारीलाई गुहेश्वरी मन्दिर परिसरबाट बुधबार पक्राउ गरेको हो । भण्डारीले पशुपति क्षेत्र विकास कोषका कोषाध्यक्ष डा. मिलनकुमार थापालाई सामाजिक संजालमा गालीगलौज गरेको र फेसबुकमा थापाको फोटोमा कालोमोसो दलेको आरोपमा प्रकाउ गरेको प्रहरीले जनाएको छ।
गुहेश्वरी मन्दिरको गर्भगृहमा रहेका अष्टदल र भैरवको सुनको मूर्ति २० वर्षको अवधिमा २ किलो भन्दा बढी खिइएको समाचार प्रकाशित भएपछि भण्डारीले थापाविरुद्ध बोलेको भिडियो सामाजिक सञ्जालमा पोष्ट गरेका थिए।
