होटल स्क्वायरका सञ्चालकविरुद्ध पक्राउ पुर्जी जारी

काठमाडौं। ललितपुरको होटल स्क्वायरका सञ्चालकविरुद्ध जिल्ला अदालत ललितपुरबाट पक्राउ पुर्जी जारी भएको छ । आज अदालतबाट होटलकी प्रबन्ध निर्देशक रोमी अर्याल र उनकी सासु ललिता भण्डारीविरुद्ध पक्राउ पुर्जी जारी भएको हो ।

ललितपुर महानगरपालिका वडा नम्बर–३ मा सञ्चालित होटल स्क्वायरको स्विमिङ पुलमा पौडी खेल्दा मानभवनका सजिलमान शाक्य गम्भीर घाइते भएका थिए । भदौ १४ मा घाइते भएका उनी अहिले पनि अचेत अवस्थामा छन् ।

पीडितका परिवारले दिएको जाहेरी दर्ता गरेर घटना अनुसन्धान भइरहेको प्रहरीले जनाएको छ । प्रहरीका अनुसार पक्राउ पुर्जी जारी भएका उनीहरू दुवै जना फरार छन् । उनीहरुको खोजी कार्य जारी गरेको प्रहरीको भनाइ छ ।