मुख्यमन्त्री कार्की भन्छन्- एमालेसँग सरकार बनाउन छलफलमा छौं

काठमाडौँ। कोशी प्रदेशका मुख्यमन्त्री केदार कार्कीले मकवानपुरको हेटौंडामा पत्रकार सम्मेलन गर्दै संघीय सरकारका कारण प्रदेश सरकार अपूरो रहेको बताएका छन्।

स्थानीय तहलाई चाहिने कानून कोशी प्रदेश सरकारले नरोकेको दाबी गर्दै उनले स्थानीय तहसँग थप समस्या भए आज हेटौंडामा हुने बैठकले निवारण गर्ने बताए। मुख्यमन्त्री कार्कीले संघीयताको मर्म अनुरूप बैठक बस्न लागेको र प्रदेशले स्थानीय तहसँग मिलेर जनतालाई कसरी सेवा दिन सक्छ भन्नेबारे सोचिरहेको पनि प्रष्ट पारे।

कर्मचारी प्रशासनले जनतालाई उचित र समयमा सेवा प्रदान गरी सुशासन कायम गर्नुपर्ने, प्रदेशका एकल अधिकार र साझा अधिकारका बारेमा मिहीन छलफल हुनुपर्ने, संविधान बनाउँदा वेला जसरी नै  प्रदेशका अधिकारका बारेमा एकमत हुनुपर्ने कार्कीले बताए।

मुख्यमन्त्री कार्कीले कोशीमा नेकपा (एमाले) सहितको सरकार बनाउने कुरा पनि छलफलमा भएको बताए। “एमालेसँग सरकार बनाउन छलफलमा छौं, पार्टीसँग सरकार समदुरीमा छ,” उनले भने।