टीआरसी विधेयक सर्वसम्मत नभए प्रक्रियाबाट टुंग्याउनुपर्छ: सभामुख घिमिरे

काठमाडौं । सभामुख देवराज घिमिरेले सर्वसम्मत शान्ति प्रक्रियाका बाँकी काम टुंगिन नसके प्रक्रियागत ढंगबाट टुंग्याएर कार्यान्वयन गर्नुपर्ने आवश्यकता रहेको बताएका छन् ।

आज काठमाडौंमा भएको संक्रमणकालीन न्यायमा बारुदी सुरुङ र विस्फोटक पदार्थका पीडितहरुको न्याय तथा माइन एक्सनमा समावेशिताको सवाल विषयक गोष्ठीमा उनले यस्ताे बताएका हुन् ।

सबैको साझा समस्या भएकाले सकेसम्म सर्वसम्मत रुपमा टुंग्याउनुपर्ने र सर्वसम्मत हुन नसके प्रक्रियागत रुपमा टुंग्याइ कार्यान्वयनमा लैजानुपर्नेमा उनले जाेड दिए । सभामुख घिमिरेले एकले अर्कोलाई दोष देखाएर नभइ जिम्मेवारीमा बसेको बेलामा यसको समाधान खोज्नुपर्ने बताए ।

सत्तापक्ष, प्रतिपक्ष, सरकार, गैरसरकारी संस्था, बुद्धिजीवी, राजनीतिज्ञहरु सबै मिलेर शान्ति प्रक्रियाका बाँकी काम ढिलो नगरी टुंग्याउनुपर्ने उनको भनाइ छ ।

उनले शान्ति प्रक्रियाका बाँकी काम अमुकअमुक नेताहरुको मुद्दा अघि सारेर मात्रै नटुंगिने आशंका व्यक्त गरे । सरकारले संसदमा टीआरसी विधेयक प्रस्तुत गरेको छ । त्यसलाई प्राथमिकताका साथ छलफलमा राख्न सभामुखको नाताले दिनुपर्ने प्राथमिकता, खेल्नुपर्ने भुमिका आफूले खेलेको उनले बताए ।