बागलुङमा बजार अनुगमनमा भेटिएका अखाद्य वस्तु नष्ट

बागलुङ। बजार अनुगमन गर्दा भेटिएका अखाद्य वस्तु तथा म्याद गुज्रेका सामान नष्ट गरिएको छ । जिल्ला प्रशासन, नगरपालिका, खाद्यप्रविधि तथा गुण नियन्त्रण कार्यालय र पर्यटन तथा उद्योग कार्यालयले अनुगमन गरेर ती सामाग्री नष्ट गरेको हो ।

म्याद गुज्रेका पेय पदार्थ र बियरलगायत फ्रिजमा राखेर बिक्री गरिरहेको भेटेपछि ती सामान नष्ट गरी व्यवसायीलाई जरिवाना समेत गराएको सहायक प्रमुख जिल्ला अधिकारी चित्राङगत बरालले बताए ।

चाडपर्व लक्षित बजार अनुगमन गर्ने क्रममा कतिपय पसलमा आधाभन्दा बढी सामान खाली भएका थिए ।

‘जुन सामान हेर्‍यो त्यही म्याद नाघेको छ‚’ बरालले भने, ‘आम नागरिकको स्वास्थ्यमा खेलवाड गरेकाहरु कारवाहीको दायरामा आइसकेका छन् ।’ उद्योग वाणिज्य संघले पनि उक्त कारवाहीलाई समर्थन गरेको छ ।

चिया तथा मिठाइ पसलमा सरसफाइ नगर्ने, गुणस्तरहीन तेल प्रयोग गर्ने समेत भेटिएको हो । खाद्यप्रविधि तथा गुण नियन्त्रण कार्यालयले तेलको गुणस्तर नाप्ने मेसिन लगाउँदा समोसा र जेरी बनाइरहेको तेलसमेत अखाद्य भेटिएपछि पकाइरहेको र बेच्न राखेको मिठाइ, समोसा र जेरी नष्ट गरिएको हो ।

पानीपुरी मसला र चकलेट तथा हर्लिक्स समेत म्याद नाघेका भेटिएका थिए । ती सामान प्रहरी समेतको उपस्थितिमा लगत राखेर नष्ट गरिएको हो ।