काठमाडौं । हङकङले नेपाल एयरलाइन्सलाई कारबाही गरेको छ । नेपाल एयरलाइन्सले लापरवाही गरेको भन्दै कारबाही गरिएको हो ।
गत २ अक्टोबरमा नेपाल एयरलाइन्सले हङकङ लगेका पाँच यात्रुमा कोरोना भाइरसको पुष्टि भएपछि हङकङले यस्तो कदम चालेको हो ।
हङकङले दुई साताका लागि नेपाल एयरलाइन्सलाई उडान गर्न रोकेको निगमकी प्रवक्ता अर्चना खड्काले बताइन् । हङकङले उडान रोकेका कारण दुई साताका लागि तय भएको एयरलाइन्सको दुईवटा उडान प्रभावित हुने भएको छ । प्रवक्ता खड्काले निगमको विमानमार्फत हङकङ गएका सबै यात्रुको कोरोनाको पीसीआर रिपोर्ट हेरेरै पठाइएको पनि बताइन् ।
“हामीले पीसीआर रिपोर्ट हेरेरै उडाएका थियौं । तर, एयरपोर्टमा पुगेपछि कोरोना परीक्षण गर्दा पोजेटिभ आएछ,” उनले भनिन् ।
सोही कारण एयरलाइन्स कारबाहीमा परेको हो । नेपालबाट ७२ घण्टा अगाडिसम्मको पीसीआर रिपोर्ट देखाए हङ्कङ जान पाइने प्रावधान थियो । सोही प्रावधानअनुसार यात्रु उडाएको तर पछि कोरोना देखिएपछि एयरलाइन्स कारबाहीमा परेको हो ।
