देशमा विधि विहीनताले पराकाष्ठा नाघ्यो : नेता केसी

काठमाडौं। नेपाली कांग्रेसका नेता अर्जुननरसिंह केसीले देशमा विधि विहीनताले पराकाष्ठा नाघेको बताएका छन् ।

आइतबार काठमाडौंमा आयोजित १४ औँ महाधिवेशनको म्याण्डेट र पार्टी रुपान्तरणको जल्दाबल्दा सवाल विषयक गोष्ठीमा बोल्दै उनले यस्तो बताएका हुन् ।

उनले देशको सबैभन्दा ठूलो अग्रगामी कदमको रुपमा भ्रष्टाचार अघि बढिरहेको भन्दै दुःख व्यक्त गरे । नेता केसीले भ्रष्टाचारमुक्त समाजको निर्माण नभएसम्म सुशासन कायम नहुने बताए ।

उनले राज्यमा सुशासन भएन भने जनतामा अनुशासन नहुने भन्दै हरेक ठाउँमा अराजक मनोवृत्तिहरु विकास भइरहेको बताए । उनले नेपाली हौँ भन्ने भावनालाई खुला रुपबाट चुनौती दिएपनि कारबाही हुन नसकेको बताए ।

नेता केसीले महंगी र मूल्यवृद्धिले नेपालका आम जनता हतोत्साहित अवस्थामा रहेको बताए । उनले रुपान्तरण र वैचारिक पुनःजागरण अहिलेको सबैभन्दा ठूलो आवश्यकता भएको बताए । जबसम्म समानुपातिक निर्वाचन प्रणाली भएसम्म पार्टी नबन्ने बताए ।

नेता केसीले यति ठूलो संख्यामा केन्द्रीय संसद्, प्रदेश सभा आवश्यक नरहेको बताए ।