नागढुंगा–मुग्लिन सडकखण्ड आजदेखि राति चार घण्टा बन्द हुने

धादिङ। आज बिहीबारदेखि संघीय राजधानीको मुख्य नाका नागढुंगा–मुग्लिन सडकखण्ड राति चार घण्टा बन्द हुने भएको छ । पृथ्वीराजमार्ग सुधार तथा विस्तारको लागि भन्दै आज रातिदेखि काठमाडौं–नागढुंगा–नौबिसे त्रिभुवन राजपथ र नौबिसे–मलेखु सडकखण्ड बन्द गर्न लागिएको हो ।

अहिले नौबिसे–मलेखु खण्डको विभिन्न स्थानमा पहरा काट्ने काम भइरहेको छ । यसरी काम गर्दा सडक अवरुद्ध हुने र यात्रुहरू मारमा पर्ने भएकाले सडक रातिमात्र बन्द गर्नु परेको धादिङ जिल्लाका प्रमुख जिल्ला अधिकारी बद्रीनाथ गैरेले जानकारी दिएका छन् ।

प्रजिअ गैरेको अध्यक्षतामा बसेको सरोकारवालाको बैठकले पृथ्वी राजमार्गको नौबिस–मलेखु सडक खण्डको विस्तार कार्य भइरहेकाले खयरघारी र पोखरेखोला नजिक बांगेमा स्वीकृत डिजाइनअनुसार सडक चौडा गर्दा निर्माणको समयमा सवारी प्रयोगकर्तालाई हुनसक्ने जोखिमलाई मध्यनजर गर्दै असोज ४ गतेदेखि असोज २० गतेसम्म राति ११ बजेदेखि बिहान ३ बजेसम्म बन्द गर्ने निर्णय भएको नागढुंगा–मुग्लिन सडक योजना प्रमुख ईश्वरी रिजालले बताए ।

सडक बन्द गरेर भीर काट्ने काम भइरहेको अवस्थामा एम्बुलेन्स र सुरक्षा निकायको सवारीबाहेकका सबै यातायातका सेवा बन्द गर्ने निर्णय भएको छ ।

पूर्वमा थाक्रे गाउँपालिका–१ एक्लेफाँट र पश्चिममा गजुरी गाउँपालिका–५ घाटबेसीमा यातायातका साधन रोकिने छन् ।

त्रिभुवन राजपथको नागढुंगा–नौबिसे खण्डको १२ दशमलव २६० किलोमिटर सडक सुधार तथा विस्तार एक अर्ब ८८ करोड ९८ लाख रुपैयाँ लागतमा दुई वर्षमा सक्ने र पृथ्वी राजमार्गको नौबिसे–मलेखु खण्डको ४३ दशमलव ५४२ किलोमिटर सडक सुधार तथा विस्तार सात अर्ब ८३ करोड ४७ लाख रुपैयाँ लागतमा तीन वर्षमा सक्ने गरी लागत अनुमान गरिएको थियो ।

तर, निर्माण कम्पनी जिअंसु र सगुन कन्स्ट्रक्सनले संयुक्त रूपमा २०७८ साल चैत २४ गते नागढुंगा–नौबिसे खण्डको १२ दशमलव २६० किलोमिटर सडक सुधार तथा विस्तार एक अर्ब ३१ करोड ८४ लाख रुपैयाँ लागतमा दुई वर्षमा सक्ने गरी सम्झौता गरी निर्माण गरिरहेका छन् ।