हुम्लामा दुई दिनदेखि हवाई सेवा अवरुद्ध

हुम्ला । सदरमुकाममा राष्ट्रिय सडक सञ्जाल नजोडिएको हिमाली जिल्ला हुम्लामा खराब मौसमको कारण दुई दिनदेखि हवाई सेवा अवरुद्ध हुँदैआएको छ । नेपालगञ्ज र सुर्खेतबाट सिमकोटको हवाई रुट पर्ने कालिकोट र बाजुरामा हवाई सेवा अवरुद्ध भएको हो ।

नागरिक उड्डयन प्राधिकरण सिमकोट शाखाका प्रबन्धक मोहन गिरीले शुक्रबारबाट हुम्ला जिल्लाको हवाई सेवा अवरुद्ध हुँदैआएको बताएका छन् । उनले सिमकोटको मौसम ठिक भए पनि हवाई मार्गका लागि इनरुट पर्ने कालिकोट र बाजुरा जिल्लामा खराब मौसमको कारण हवाई सेवा सुचारु हुन नसकेको बताए।

दुवै दिन बिहान हुम्लाको मौसम खराब भए पनि ९ बजेपछि खुलेको थियो । शुक्रबार बिहान सीता, समिट र तारा एयरका जहाजले नेपालगञ्जबाट एक साथ उडान भर्न खोजेको भए पनि कालिकोट र बाजुरा जिल्लामा खराब मौसम भएका कारण जहाज छिर्न नसकेपछि डाइभर्ट भएको थियो ।

उनले यो क्रम शनिबार पनि सीता, समिट र तारा एयरका चार वटा जहाज नेपालगञ्जबाट उडेर कालिकोटबाटै फिर्ता भएको बताए । कालिकोटमा बाक्लो कुहिरो र बादल लागेको कारण शनिबार पनि जहाज छिर्न सक्ने अवस्था नभएपछि सबै जहाज नेपालगञ्ज फिर्ता भएको बताए ।