नक्कली शरणार्थी प्रकरणमा ओलीलाई विश्वप्रकाशको जवाफ : हामी न्यायाधीश होइनौं

काठमाडौं । नेपाली कांग्रेसको महामन्त्री विश्वप्रकाश शर्माले नक्कली शरणार्थी प्रकरणमा एमाले अध्यक्ष केपी शर्मा ओलीको अभिव्यक्तिप्रति आपत्ति जनाएका छन्। ओलीले निर्दोषलाई फसाउन खोजिएको भन्दै दिएको अभिव्यक्तिप्रति उनले आपत्ति जनाएका हुन् ।

सरकारको नीति तथा कार्यक्रममाथि आज संसदमा भएको छलफलमा महामन्त्री शर्माले भने, ‘नक्कली भुटानी शरणार्थी प्रकरणमा प्रमुख प्रतिपक्षी दलको नेताले दोषीलाई उम्काउने खोजिँदै भन्ने आशंकामा राज्यले ध्यान देला नै। तर, उहाँले निर्दोष फसाउने प्रयास भइरहेको छ भन्ने वाक्य प्रयोग गर्नुभयो। यही रोष्ट्रमबाट। को दोषी को निर्दोष प्रहरीले छानबिन गर्दैछ। यहाँबाट फैसला सुनाउनका लागि हामी न्यायाधीश होइनौं।’

कांग्रेस नेताहरु विगतमा जेल परेको र अहिले पनि मुद्दा सामना गरिरहेको भएपनि को निर्दोष को दोषी नभनेको महामन्त्री शर्माले बताए । उनले राष्ट्रिय स्वतन्त्र पार्टीलाई लक्षित गर्दै सरकारलाई दिएको समर्थन फिर्ता लिने समय नभएको उल्लेख गरे ।

उनले भने, ‘भ्रष्टाचारको फाइल खोलेको बेला बधाइ छ सरकार भन्ने समय हो । सरकारलाई दिएको समर्थन फिर्ता लिने समय होइन ।’