हेर्नुहोस् दैनिक काजु खानुका फाइदाहरु, दिनमा कति खाने ?

काठमाडौँ। ‘ड्राइ फ्रुट्स’मध्ये काजु निकै स्वादिलो खानेकुरा हुनुका साथै स्वास्थ्यका लागि फाइदाजनक पनि छ । ड्राई फुट्सको कुरा गर्दा काजु अत्यधिक खाइनेमध्येमा पर्छ । यसको प्रयोग खानादेखि मिठाइसम्ममा गरिन्छ ।

काजु जति स्वादिलो छ, त्यति नै स्वास्थ्यका लागि फाइदाजनक छ भने यसलाई ड्राइ फ्रुट्स’को राजाको रूपमा लिइन्छ । काजु बालबालिकादेखि वृद्धवृद्धासम्म सबैको मनपर्ने सुख्खा फल हो । काजु खाँदा हुने फाइदा अनेकौँ छन् ।

काजुमा प्रोटिन, मिनरल्स, फाइबर र एन्टिअक्सिडेन्ट प्रशस्त मात्रामा पाइन्छ । काजु फलाम, फाइबर, फोलेट, म्याग्नेसियम, फस्फोरस, सेलेनियम र क्याल्सियमको राम्रो स्रोत हो । दैनिक काजु खाने मानिसको शरीरमा क्याल्सियम, जिंक र म्याग्नेसियमको कमी हुँदैन ।

हेर्नुहोस् यस्ता छन् काजुका फाइदा :-

-काजु खाँदा हड्डी बलियो हुन्छ । काजुमा क्याल्सियम र म्याग्नेसियम पाइन्छ जुन हड्डीका लागि फाइदाजनक हुन्छ ।

-काजु खाँदा शरीरमा ग्लुकोजको मात्रा नियन्त्रणमा रहन्छ । त्यसैले काजु मधुमेहका बिरामीका लागि पनि फाइदाजनक हुन्छ ।

-जो मानिसले दैनिक सीमित मात्रामा काजु खान्छ, उनीहरुको पाचन क्रिया राम्रो हुन्छ । काजु खाँदा फाइबर हुन्छ, जसले ग्यास र कब्जियतको समस्या पनि हटाउँछ ।

-दैनिक ३-४ वटा काजु खाँदा तौल नियन्त्रणमा पनि मद्दत पुग्छ। काजु खाँदा मोटोपना कम हुन्छ । यसमा राम्रो फ्याट र कार्बोहाइड्रेट हुन्छ जसले मेटाबोलिजम बढाउँछ ।

-काजुमा भिटामिन ई र एन्टी-अक्सिडेन्ट गुण पाइन्छ, जसले तपाईंको छाला र कपाललाई स्वस्थ राख्छ । दैनिक काजु खाँदा छालामा चाउरी पर्ने समस्या कम हुन्छ ।

दिनमा कति काजु खाने ?

विशेषज्ञका अनुसार एक दिनमा ६ देखि ७ वटा काजु खान सकिन्छ । अत्यधिक काजु सेवनले स्वास्थ्यमा हानिकारक असर पुर्याउँछ । यसले फाइदाकाे सट्टा बेफाइदा गर्छ ।