पक्राउ परेका टोपबहादुरको बयान राति नै सकियो, खाँणको मात्र बाँकी, सोधपुछ गर्न खोज्दा खाँण परे बिरामी

काठमाडौं। शरणार्थीका नाममा भएको ठगी प्रकरणमा आइतबार राति पक्राउ परेका पूर्वउपप्रधानमन्त्री टोपबहादुर रायमाझीको बयान लिने कार्य हिजो राति सकिएको छ । जिल्ला सरकारी वकिलको कार्यालयमा उनको बयान लिइएको थियो ।

हिजो सोमबार अपराह्नदेखि बयान लिन सुरु गरिएको थियो । राति करिब ९ बजेतिर बयान लिने कार्य सकिएको सो कार्यालयका प्रमुख एवं सहन्यायाधिवक्ता अच्युतमणि नेउपानले जानकारी दिए ।

“उहाँ (टोपबहादुर रायमाझी)को बयान हिजो (सोमबार) राति ९ बजे सकिएको हो,” उनले भने ।

उनका अनुसार थुनामै रहेका तथा यो प्रकरणमा पक्राउ परेका पूर्वगृहमन्त्री बालकृष्ण खाँणबाहेक सबैको बयान लिने कार्य सकिएको छ । खाँणको बयान लिने कार्य आज सकिने उनले बताए । बयानका लागि सोधपुछ गर्न खोज्दा खाँणले बिरामी भएको र बयान दिन नसक्ने जनाएकाले बयान रोकिएको सरकारी वकिल कार्यालयले जनाएको छ ।

यस्तै रायमाझीलाई गएको आइतबार बेलुका प्रहरीले काठमाडौंको बूढानीलकण्ठबाट पक्राउ गरेको थियो । सोमबार काठमाडौं जिल्ला अदालतले उनलाई तीन दिन हिरासतमा राखेर अनुसन्धान गर्न अनुमति दिएको छ । उनी हाल प्रहरी हिरासतमै छन् ।

नेपाली कांग्रेसका नेता समेत रहेका खाँण पनि प्रहरी हिरासतमै छन् । पछिल्लोपटक उनलाई चार दिन हिरासतमा राखेर अनुसन्धान गर्न अदालते अनुमति दिएको छ । जिल्ला सरकारी वकिलको कार्यालयमा आज पनि उनको बयान लिने कार्य हुनेछ ।

नेपाली नागरिकलाई भुटानी शरणार्थी बनाएर अमेरिका पठाउन खोजेको घटनामा प्रहरीले छानबिन गरिरहेको छ । शरणार्थी प्रकरणमा हालसम्म १३ जना पक्राउ परिसकेका छन् ।