जापानसँग तुलना गर्नेहरुलाई प्रश्नः पार्टी एकतादेखि चुनावमा दुई तिहाई ल्याउँदा ओली बिरामी थिएनन् ? 

काठमाडौं । जापानका प्रधानमन्त्री सिन्जो आवेले स्वास्थ्यका कारण राजीनामा दिएको बिषय शुक्रबार दिनभरी केही ब्यक्तिले सामाजिक संजालमा उछालेका छन् । नेकपाभित्रका प्रधाननमन्त्री बिरोधी एक पक्षका नेता कार्यकर्ताले यसलाई जोडतोडका साथ उठाएका छन् । सामाजिक संजालमा जापानका प्रधानमन्त्रीको राजीनामाको बिषयलाई नेपालको सन्दर्भमा जोड्न खोजिएको छ । जापानका आवेले स्वास्थ्यमा सामान्य समस्या आउनासाथ राजीनामा दिए तर नेपालका प्र्रधानमन्त्री केपी शर्मा ओलीले नदिएको आसय झल्किने खालका बिषय उठान गरिएका छन् ।  

सामाजिक संजालमा जापानका प्रधानमन्त्रीको राजीनामाको बिषय र नेपालको सन्दर्भ अलग भएको भन्दै प्रतिवाद पनि भइरहेको छ । तत्कालीन प्रेस चौतारीका अध्यक्ष तथा पत्रकार राजेन्द्र अर्यालले बिरामी अवस्थामै प्रधानमन्त्री केपी शर्मा ओलीको नेतृत्वमा नेकपाले दुई तिहाई बहुमत ल्याएको र नाकाबन्दीदेखि नक्सा जारी गर्ने ऐतिहासिक कार्य गरेको उल्लेख गरेका छन् । पार्टी एकताको ऐतिहासिक काम गर्नेदेखि पार्टीलाई १ नम्बरमा बनाउँदा बिरामी नदेख्ने अहिले जापानी प्रधानमन्त्रीको प्रसंग किन उठाउन खोजिंदैछ भन्ने प्रश्न उनले गरेका छन् ।

अर्यालले सामाजिक संजालमा लेखेका छन्–‘साथीहरु, कालो चस्मा लगाएर अन्धो भएको नाटक किन ? आफ्नो ब्यक्तिगत सम्पत्ति पनि त्यागेको घोषणा गर्नुभएका पार्टी अध्यक्ष तथा प्रधानमन्त्री केपी ओलीको बाँकी जीवन नेपाल र नेपालीको सेवामा समर्पित छ । दृढ इच्छाशक्ति , उच्च मनोबल अनि अदम्य आत्मविश्वाससँगै जस्तोसुकै कठिन परिस्थिति, समस्या र चुनौतीका पहाड छिचोल्दै त्यस्लाई अवसरका रुपमा रुपान्तरण गर्न सक्ने सामथ्र्य राख्ने राजनीतिक कन्भिन्सन भएका राजनेता ओलिमाथि निरन्तर प्रहार किन भैरहेको छ ? कुरा सिधा छ, अध्यक्ष तथा प्रधानमन्त्री ओलीको कन्भिन्सन, अध्यक्ष प्रचण्डको भावुकता र लचकता, बरिष्ठ नेता माधव नेपालको सकारात्मक निस्क्रियता, उपाध्यक्ष बामदेब गौतमको ६ सूत्रसहितको हस्तक्षेपपछि पार्टी दुर्घटनाबाट जोगिदै अघि बढदै गर्दा चियाको कपमा तुफान ल्याउने दुस्प्रयास नगर ।’

अर्यालले ७ वटा बुँदामा प्रधानमन्त्री ओलीको आवश्यकता र औचित्य पुष्टि गर्न खोजेका छन्ः

१. बिरामी हुँदा नै नेकपा एमालेको पार्टी अध्यक्ष जित्ने ब्यक्ति हुन् । जसले एमालेको सान र मान बढाए ।

२. बिरामी हुँदा नै स्थानीय तहमा नेकपा एमालेलाई १ नम्बर पार्टी बनाउने ब्यक्ति हुन् ।

३. बिरामी हुँदा नै दुनियाँले असम्भव ठानेको र स्वयं नेतृत्वलाई समेत बिश्वास नभइरहेका बेला चमत्कारिक रुपमा नेकपा एमाले र नेकपा माओवादी केन्द्रबीच एकता गराई नेकपा बनाउने ब्यक्ति हुन् । 

४. बिरामी हुँदा नै संसदीय चुनावमा गठबन्धन (नेकपा)लाई दुई तिहाई बहुमतको पार्टी बनाउने सर्वोच्च कमान्डर हुन् । र, उनैको नेतृत्वलाई विश्वास गरेर जनताले मत दिए ।

५. बिरामी हुँदा नै नाकाबन्दीबाट भारतलाई घुँडा टेकाए ।

६. अहिले सुनौलो इतिहास रच्दै नेपालको नयाँ नक्सा सार्वजनिक गर्ने ब्यक्ति हुन् ।

७. त्यो बेला बिरामी नदेख्नेहरु अहिले ओलीलाई बिरामी देख्न थालेछन् । यो देश कसैले बनाउँछ भने त्यो केपी ओलीले बनाउने हो अरु टेस्टेडहरु ओलीका प्रतिस्पर्धी हुन सक्दैनन् ।

जापानी प्रधानमन्त्रीको राजीनामासँग तुलना गर्नेहरु अहिले ओलीलाई बिरामी देख्दैछन् । ओलीको बाँकी जीवन नेपाल र नेपालीका लागि हो । देश र जनताको चाहना अनुसार उहाँ नेकपाको पार्टी अध्यक्ष र यो देशको प्रधानमन्त्री हो । आवश्यकता र समयको माग अनुसार हस्तान्तरण र पुस्तान्तरण । धेरै भावनामा नबगौं ।