आरआर क्याम्पसमा स्थगित भएको स्ववियु निर्वाचन चैत २७ मा गर्ने सर्वपक्षीय सहमति

काठमाडौं । रत्नराज्यलक्ष्मी (आरआर) क्याम्पसमा चैत ५ गते हुने भनिएको स्वतन्त्र विद्यार्थी युनियनको चुनाव यही चैत २७ गते हुने भएको छ ।

आज आइतबार सकेको सर्वपक्षीय बैठकमा चैत २७ गते स्ववियु निर्वाचन गर्ने सहमति जुटेको नेविसंघका नेता अशोकसिंह विष्टले बताए ।

विद्यार्थी संगठनको विवादले चैत ५ गते हुने भनिएको निर्वाचन स्थगित भएको थियो । स्ववियु निर्वाचनको विषयलाई लिएर सत्ता गठबन्धन निकट विद्यार्थी संगठनहरूले गत फागुन २७ गतेदेखि आरआर कलेजमा ताला लगाएका थिए ।

अनेरास्ववियु (एमाले) लाई फाइदा पुग्नेगरी निर्वाचन अधिकृतले काम गर्दै आएको भन्दै उनीहरूले निर्वाचन अधिकृतको राजीनामा माग गर्दै आएका थिए ।

क्याम्पस प्रशासनले नयाँ निर्वाचन अधिकृत तोक्ने र विद्यार्थी भर्ना छानाविन गर्ने भएपछि चैत २७ मा निर्वाचन गर्ने सहमति भएको स्रोतले जनाएको छ।