राप्रपाका मन्त्री सिटौलाले भोलि राजीनामा बुझाउने

काठमाडौँ। राष्ट्रिय प्रजातन्त्र पार्टी (राप्रपा) का १ नम्बर प्रदेश सरकारका मन्त्रीले भोलि राजीनामा बुझाउने भएका छन् ।

उद्योग, कृषि तथा सहकारी मन्त्री भक्ति सिटौलाले भोलि आइतबार राजीनामा दिने बताए ।

आजै राजीनामा बुझाउने निर्णय भए पनि आज सार्वजनिक बिदा शनिबार भएकाले भोलि मात्रै राजीनामा बुझाउने उनले बताए । सिटौला पुस २५ गते विना विभागीय मन्त्री नियुक्त भएका थिए ।

राप्रपा केन्द्रीय कार्यसम्पादन समिति र संसदीय दलको शनिबार बसेको संयुक्त बैठकले संघ तथा प्रदेश सरकारबाट बाहिरिने निर्णय गरेको छ ।

राप्रपाले प्रधानमन्त्री पुष्पकमल दाहाल ‘प्रचण्ड’ सरकारलाई दिएको समर्थन फिर्ता लिने भएको छ ।