राप्रपाका मन्त्रीहरूले आजै राजीनामा दिने तयारी

काठमाडौँ। राष्ट्रिय प्रजातन्त्र पार्टी (राप्रपा) ले पुष्पकमल दाहाल प्रचण्ड नेतृत्त्वको सरकारलाई दिएको समर्थन फिर्ता लिएर सरकारबाट बाहिरिएको छ । आज शनिबार बिहान पार्टी कार्यालय धुम्बाराहीमा बसेको राप्रपाको आकस्मिक बैठकले सरकारबाट निस्किने निर्णय गरेको हो ।

केन्द्रीय सरकार र प्रदेश सरकारलाई दिएको समर्थन फिर्ता लिने निर्णय भएको राप्रपाका नेता धवलशम्शेर राणाले बताए । महामन्त्री धवलशमशेर जबराले प्रधानमन्त्री प्रचण्डलाई भेटेर सरकारमा सहभागी संघ र प्रदेशका मन्त्रीले आजै राजीनामा बुझाउने जानकारी दिए । गत पुस १० गते बनेको नयाँ गठबन्धनमा सहभागी भएको राप्रपा माघ ३ गते अध्यक्ष राजेन्द्र लिङ्देनको नेतृत्वमा तीन मन्त्री र एक राज्यमन्त्रीसहित सरकारमा सहभागी भएको थियो ।

राप्रपाबाट उपप्रधान तथा ऊर्जामा राजेन्द्र लिङ्देन, कानूनमा ध्रुवबहादुर प्रधान र शहरी विकासमा विक्रम पाण्डे मन्त्री छन् । दीपकबहादुर सिंह ऊर्जा राज्यमन्त्री छन् ।

यस्तै, राप्रपाका तर्फबाट सरकारमा सहभागी मन्त्रीहरूले पार्टीको निर्णयअनुसार आजै राजीनामा दिने तयारी गरेका हुन् ।