मेयर साम्पाङलाई साबुन उद्योगको काम रोक्न अदालतको आदेश

विराटनगर । धरान उपमहानगरपालिकाका मेयर हर्कराज साम्पाङलाई साबुन उद्योग निर्माण रोक्न अदालतले अन्तरिम आदेश दिएको छ ।

उच्च अदालत विराटनगरले धरान उपमहानगरपालिकालाई वन क्षेत्रमा साबुन उद्योग निर्माणको काम रोक्न अन्तरिम आदेश दिएको हो ।

धरान उपमहानगरपालिकाले कार्यपालिका निर्णयका आधारमा धरान- २० मा पर्ने जलकन्या सामुदायिक वनको जग्गामा सावुन उद्योग निर्माणको काम सुरु गरेको थियो ।

मेयर हर्क सम्पाङले वनको जग्गामा वातावरणीय प्रभाव मूल्यांकन नगरी काम सुरु गरेपछि जिल्ला वन कार्यालय सुनसरीले उच्च अदालत विराटनगरमा रिट दायर गरेको थियो ।

न्यायाधीश रामबहादुर थापा र किरणकुमारी गुप्ताको संयुक्त इजलासले हिजो बुधबार निवेदनको किनारा नलागेसम्म काम अघि नबढाउन अन्तरिम आदेश जारी गरेको श्रोतले जनाएको छ। 

साथै उच्च अदालतको अन्तरिम आदेश आएसँगै बिहीबार बिहान मेयर साम्पाङले अन्तरिम आदेशलाई विकास विरोधी भनेका छन् । सामाजिक सञ्जाल फेसबुकमा वन विभाग र राजनीतिक दल धरानको उत्पादन र रोजगारी रोक्न लागेको प्रतिक्रिया दिएका छन् । उनले फेसबुकमा लेखेका छन् ‘माया धराने साबुन फ्याक्ट्री निर्माण गर्न नदिने स्टे अर्डर जारी गरे । वन विभाग र पार्टी लागे धरानको उत्पादन र रोजगारी रोक्न ।’