चुनावका दिन ४ गते चार्टर्ड उडान मात्रै हुने 

काठमाडौँ। आगामी ४ मङ्सिरका लागि तय भएको  प्रतिनिधिसभा तथा प्रदेशसभाको निर्वाचनका दिन नजिकिएसँगै हवाई यात्रुको चाप पनि उच्च दरले बढेको छ। 

अब चुनाव हुन ५ दिन मात्र बाँकी रहेकाले राजधानी काठमाडौँ भित्रिने र बाहिरिने यात्रुहरुको सङ्ख्या निकै बढेको विमानस्थल कार्यालयले जानकारी दिएको छ।

निर्वाचनका दिन नजिकिएसँगै दैनिक १४ हजारभन्दा बढीले काठमाडौँस्थित आन्तरिक विमानस्थल प्रयोग गरिरहेको विमानस्थलका प्रवक्ता टेकनाथ सिटौलाले जानकारी दिए।

आसन्न प्रतिनिधिसभा तथा प्रदेशसभाको निर्वाचनका लागि मतदाता गन्तव्यमा पुग्नुपर्ने भएकाले अहिले याुत्रको भीडभाड बढेको हो।

उनकाअनुसार निर्वाचनको अघिल्ला दिन मङ्सिर १, २ र ३ गते तथा मतदानपछि मङ्सिर ५ र ६ गते उडानको चाप बढी हुने अनुमान गरिएको छ।

बुध्द एयरले हाल दैनिक एक सय ५० उडानमार्फत् ७ हजार पाँच सयभन्दा बढी यात्रुलाई सेवा दिइरहेको छ। 

पछिल्लो समय हवाई इन्धनका कारण टिकट मूल्य बढेको छ।

काठमाडौँदेखि नजिकको गन्तव्य मानिने सिमराका लागि न्यूनतम रु तीन हजार छ सय र बढीमा चार हजार १५ भाडा दर कायम छ। साथै, काठमाडौँ–धनगढीका लागि अधिकतम रु १६ हजार भाडा तोकिएको छ।

यती एयरलाइन्सले छ थान एटिआरमार्फत् सेवा दिइरहेको छ।

मङ्सिर ४ गते उडान नहुने मतदान हुने दिन मङ्सिर ४ गते आन्तरिक उडानतर्फ नियमित उडान भने हुने छैन। उक्त दिन अत्यावश्यक र चार्टड उडान मात्रै हुने विमानस्थल कार्यालयको भनाइ छ।

‘चार्टर्ड उडान र अत्यावश्यक उडानका लागि निर्वाचन आयोगसँग सहमतिमा हुनसक्छ तर नियमित उडान भने हुँदैन’, विमान स्थलका प्रवक्ता सिटौलाले भने।