लमजुङ पुगेर प्रचण्डले भने- ओलीसँग एकता गरेर ज्ञान प्राप्त गरिसकेँ अब अर्को गठबन्धन बन्दैन

काठमाडौँ। सत्ता गठबन्धन दल नेकपा माओवादी केन्द्रका अध्यक्ष पुष्पकमल दाहाल प्रचण्डले कतिपयले अबको चुनावपछि गठबन्धन के हुन्छ? नयाँ बन्छ कि भन्ने जिज्ञासामाथि अहिलेको गठबन्धनलाई आगामी १५/२०  वर्षसम्म कायमै राखिने दाबी गरेका छन्।

लमजुङको राइनासमा आज सोमबार भएको चुनावी सभालाई सम्बोधन गर्दै प्रचण्डले भने, ‘यो गठबन्धन चुनावसम्म मात्रै होइन। कतिपयले भन्छन् चुनावपछि फेरि अर्कै गठबन्धन बन्छ कि, हुँदैन केही पनि। जबसम्म यो देशमा संविधान, लोकतन्त्र र शान्तिमाथि तथा जनताले पाएको अधिकारमाथि चुनौती रहिराख्छ, तबसम्म यो गठबन्धन पनि गइराख्छ। १०, १५, २० वर्षसम्म जाओस्। अब अर्को  गठबन्धन बन्दैन।’

प्रचण्डले भने,‘केपी ओलीसँग एकता गरेर मैले ज्ञान प्राप्त गरेर आएको छु। अब त्यो ज्ञान यताउता हुनेवाला छैन। यही गठबन्धनलाई लिएर जाने हो,’ उनले भने।

अहिले आगामी मंसिर ४ गते हुँदै गरेको  प्रतिनिधिसभा तथा प्रदेशसभाकाे निर्वाचन नजिकिएसँगै राजनीतिक दल र उम्मेदवारहरू प्रचार-प्रसारकाे लागि तीव्र द‍ाैडधुपमा छन्।