ओलीले देउवालाई भने– ‘गृहमन्त्री हुँदा १२२ जना मान्छेको गोली हानेर हत्या गर्नुभयो’

काठमाडौँ। नेकपा (एमाले) का अध्यक्ष एवं पूर्व प्रधानमन्त्री केपी शर्माओलीले एमालेले देशको स्वाधीन अर्थतन्त्रका लागि बनेको पार्टी एमाले मात्र एक भएको दाबी गर्दै गठबन्धन तर्फ लक्षित गरि एमाले जनताका नाममा आतङ्क मच्चाउने पार्टी नभइ देशमा विकास र समृद्धि ल्याउने पार्टी रहेको बताए । 

आज आइतबार चुनावी सभालाई सम्बोधन गर्न दैलेखको जम्बुकाँध पुगेका ओलीले पाँचपटक प्रधानमन्त्री बनेका शेरबहादुर देउवाले देशकालागि के काम गर्नुभयो ? भन्दै कडा प्रश्न गरे । उनले देउवा गृहमन्त्री हुँदा मान्छेहरू मारेको आरोप समेत लगाए । 

उनले भने,‘ देउवाले के गर्नुभयो ? गृहमन्त्री हुँदा सर्वसाधारण १२२ जनालाई गोली हानेर हत्या गर्नुभयो । ५० प्रतिशत एमाले कार्यकर्तालाई पक्राउ गर्नुभयो ।’

यस्तै ओलीले अव्यवहारिक कुरा गर्दै माओवादी केन्द्रका अध्यक्ष पुष्पकमल दाहाल प्रचण्ड हिँडेको आरोप पनि लगाएका छन्। ओलीले भोटका लागि जसलाई पनि मन्त्री बनाउँछु भन्दै अध्यक्ष प्रचण्ड हिँडेको बताएका थिए ।