पम्फा भुसाल भन्छिन्– निर्वाचन जित्नेमा ढुक्क छु, कुनै शंका छैन्  

काठमाडौँ। सत्ता गठबन्धनका तर्फबाट ललितपुर क्षेत्र नं ३ का उमेदवारसमेत रहेकी ऊर्जा, जलश्रोत तथा सिंचाइमन्त्री एवं नेकपा (माओवादी केन्द्र) उपमहासचिव पम्फा भुसालले आउदै गरेको प्रतिनिधि सभाको निर्वाचनमा आफ्नो जित रहेको दाबी गरेकी छन् ।  

आइतबार ललितपुर निर्वाचन क्षेत्र नम्बर ३ को चुनावी घरदैलो कार्यक्रममा उनले यस्तो पुष्टि गरेकी हुन् । मन्त्री भुसालले ललितपुर निर्वाचन क्षेत्र नम्बर ३ बाट आफू यसअघि पनि दुई पटक विजयी भइसकेको उल्लेख गर्दै यसपटक पनि आफ्नै विजयी हुनेमा विश्वस्त रहेको बताइन् ।

‘मैले यो क्षेत्रमा राम्रा कामहरू गरेको छु, जनतालाई नराम्रो लाग्ने कुनै काम पनि गरेको छैन, यसभन्दा अगाडि पनि दुई पटकसम्म जितिसकेको हो, त्यस्तो डर मलाई छैन, जनताले, मतदाताले धेरै राम्रो प्रतिक्रिया दिनुभएको छ,’ मन्त्री भुसालले भनिन्, ‘विगतमा झैँ यस पटक पनि आम मतदाताहरू खुसी हुनुहुन्छ, सबैको साथ र सहयोग मलाई प्राप्त छ । गठबन्धन र विशेष गरेर यही क्षेत्रको नागरिक भएकाले जनताले हामीलाई धेरै मन पराउनुभएको छ ।’