अबको यात्रा आर्थिक क्रान्तिका लागि हो, गोरखाबाटै सुरू गरे : प्रचण्ड

काठमाडौँ। सत्ता गठबन्धन दल नेकपा माओवादी केन्द्रका अध्यक्ष पुष्पकमल दाहाल प्रचण्डले आफ्नो निर्वाचन क्षेत्र गोर्खा पुगेर आसन्न निर्वाचनलाई सामान्य निर्वाचनको रूपमा मात्रै नलिन आग्रह गरेका छन् । 

भच्चेकमा आज भएको कोणसभामा बोल्दै प्रचण्डले भने,’ अबको मेरो बाँकी जीवन आर्थिक क्रान्तिका लागि हो। त्यसैले छिटो आर्थिक क्रान्ति गर्न गोरखा २ रोजेको हुँ। 

प्रचण्डले भने, “राजनैतिक परिवर्तनको तयारी गोरखाको यही भूगोलबाट गरेको हुँ, राजनैतिक परिवर्तन भयो तर जनताको अवस्था परिवर्तन भएन, जनतालाइ समृद्ध बनाउन र देशमा आर्थिक क्रान्ति गर्न गोरखा निर्वाचन क्षेत्र नम्बर २ मा आएको हुँ” ।

गोरखा २ मा सत्ता गठबन्धनका उम्मेदवार समेत रहेका प्रचण्डले आफु उक्त क्षेत्रबाट निर्वाचित भए आगामी ५ वर्षभित्र गोरखाका कच्ची सडक कालोपत्र गरिने बताएका छन्।

उनले धुलो, हिलो र खाल्डाखुल्डी भएका सडक भई आफू निर्वाचन क्षेत्रका गाउँ-गाउँ पुगेकोले अबको ५ वर्षभित्र ती सडक कालोपत्र गरिने बताए।

उनले आफूलाई विजयी गराएर पठाए मात्र सिंगो गोरखा जिल्लाको विकास निर्माणमा लाग्ने बताएका थिए।

आगामी चुनावी कार्यक्रमका लागि आज गोरखा आइपुगेका प्रचण्डले ‘गोरखाबाट आर्थिक विकासको नमूना प्रस्तुत गर्ने बताए । उनले संविधान नमान्ने प्रतिगमनलाई परास्त गर्न पनि आग्रह गरेका थिए।