प्रचण्डले गरे जोशीको निधनप्रति दुःख व्यक्त : ‘जोशीले पुर्‍याएको योगदान चीर स्मरणीय रहनेछ ’

काठमाडौं। सत्तारुढ दल नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले  शताब्दी पुरुष सत्यमोहन जोशीको निधनप्रति दुःख व्यक्त गरेका छन् । उनले जोशीको निधनप्रति दुःख व्यक्त गर्दै भने नेपाली कला, साहित्य र भाषा संस्कृतिलाई नेपाल र विश्वभर चिनाएर स्थापित गर्न शताब्दी पुरुष जोशीले पुर्‍याएको योगदान सम्पूर्ण नेपालीका लागि चीर स्मरणीय रहनेछ।

अध्यक्ष प्रचण्डले आइतबार एक विज्ञप्ति जारी गर्दै नेपाली भाषा, साहित्य र संस्कृतिका धरोहर ‘शताब्दी पुरुष’ को आज बिहान१०३ वर्षको उमेरमा दुःखद निधन भएको खबरले सबै नेपालीलाई स्तब्ध बनाएको बताएका छन्। उनले जोशीप्रति हार्दिक श्रद्धाञ्जली अर्पण गर्दै शोक सन्तप्त परिवारजनमा समवेदना व्यक्त गरेका छन्।

१०३ वर्षको उमेरसम्म पनि जोशीको सामाजिक क्रियाशीलता विश्वभरिका मानव समुदायलाई उत्प्रेरणाको स्रोत बनेर रहने छ । साथै सन्देशमा अध्यक्ष प्रचण्डले भने, ‘नेपाल सरकार र नेपाली जनताले उहाँको योगदान र क्रियाशीलताको सदा उच्च सम्मान गरिरहने छन् भन्ने मैले विश्वास लिएको छु।’

आइतबार ललितपुरको ग्वार्कोस्थित किष्ट मेडिकल कलेजमा बिहान ७ बजेर ९ मिनेटमा जोशीको निधन भएको थियो।