भीम रावल भन्छन्- देशी विदेशीको षडयन्त्रकै कारण मेराे टिकट खाेसियो

काठमाडौं। नेकपा एमाले नेता भीम रावलले बिहीबार काठमाडौँको बबरमहलस्थित कार्की ब्यांक्वेटमा आयोजित पत्रकार सम्मेलनमा बोल्दै आफूलाई प्रतिनिधिसभाको टिकटबाट हटाउनुको मूल कारण देशी विदेशी षडयन्त्र भएको र त्यसमै परेर एमाले अध्यक्ष केपी शर्मा ओलीले टिकट नदिएको बताएका छन् । 

उनले आफ्नो देशभक्त र राष्ट्रहितको तेजोबध गर्नकै लागि राजनीति सिध्याउन टिकट नदिइएको आरोप समेत लगाए । उनले आफूले एमसीसीकाे विराेध गर्दा र विपक्षमा भाेट हाल्दा त्यसलाई अहिले टिकट दिने बेला उठाइएकाे बताए ।

रावलले ओलीले गरेको निर्णय प्रथम दृष्टिमै स्वेच्छारिता र गलत रहेको पनि दाबी गरे । ‘षड्यन्त्रपूर्ण स्वेच्छाचारी ढंगले मलाई निर्वाचन नलड्ने भ्रमपूर्ण प्रचार गरियो । सोहीअनुसार रावल सम्पर्कविहीन भनेर प्रचार गरियो । माफी माग्नुपर्ने हल्ला चलाइयो । ओलीका मान्छेले गरेको अध्ययनमा मलाई हराउन नसकिने देखियो । त्यसपछि कुनै योगदान नै नभएका व्यक्तिलाई टिकट दिइयो,’उनले भने । 

नेता रावलले ५० वर्ष आफूले खुनपसिना बगाएको एमाले पार्टीलाई फेरि पनि आन्तरिक संघर्ष गरेर ठीक ठाउँमा ल्याउन सक्ने अपेक्षा आफूले नत्यागेको र पार्टी अध्यक्ष ओलीले टिकट खोसे पनि आफुले एमाले नछाड्ने रावलको अडान थियो।