समयमा काम नगर्ने कम्पनीलाई कारबाही हुन्छ : मन्त्री चौधरी

काठमाडौँ।  सहरी विकासमन्त्री मेटमणि चौधरीले समयमै काम सम्पन्न नगर्ने निर्माण कम्पनीलाई कडा कारबाही गर्ने बताएकी छन् । बाँके जिल्लाको भेरी अस्पताल नेपालगन्जमा निर्माणाधीन ओपिडी भवनको बिहीबार स्थलगत निरीक्षण गर्दै मन्त्री चौधरीले यस्तो चेतावनी दिएकि हुन् ।

“निर्माण कम्पनीले काम सम्पन्न गर्नुपर्ने समयको सबैभन्दा बढी ख्याल गर्नुपर्छ” मन्त्री चौधरीले भनिन् , “समयमै काम सम्पन्न नगर्ने र पटक–पटक म्याद थप गर्ने कार्य रोक्न आवश्यक छ । निर्माण कम्पनीले यही मङ्सिर २३ गतेभित्र अस्पतालको सम्पूर्ण निर्माण कार्य सम्पन्न गरी हस्तान्तरण गर्ने गरी काम गर्नुपर्छ ।”

भेरी अस्पतालमा सहरी विकास मन्त्रालयले निर्माण गरिरहेको ओपिडी भवन निर्माण सम्पन्न भई हस्तान्तरण भएपछि भेरी अस्पतालको स्तरोन्नति भई करिब ५०० शैयाको हुनेछ ।