नागरिकता विधेयकमाथि राष्ट्रिय सभामा छलफल सुरु

काठमाडौं।  नेपाल नागरिकता विधेयक- २०७९ माथि दोस्रो दिन राष्ट्रिय सभामा छलफल सुरु भएको छ। 

नेपाल नागरिकता विधेयक (पहिलो संशोधन)-२०७९ माथि बिहीबारबाट छलफल सुरु भएको हो। छलफलमा भाग लिने सांसदहरुको बोल्नेक्रम नसकिएपछि आजका लागि बैठक बोलाइएको हो।

उक्त विधेयकमाथि छलफल सकिएपछि आजको बैठकमा गृहमन्त्री बालकृष्ण खाडले राष्ट्रपतिबाट पुनरविचारका लागि फिर्ता भइ प्रतिनिधि सभाबाट सन्देशसहित प्राप्त नेपाल नागरिकता विधेयक (पहिलो संशोधन)  विधेयक २०७९ लाई पारित गरियोस् भन्ने प्रस्ताव प्रस्तुत गर्नेछन्।

यसअघि प्रतिनिधि सभाले विधेयक जस्ताको त्यस्तै पारित गरेर सन्देशसहित राष्ट्रिय सभामा पठाएको थियो। 

अब राष्ट्रिय सभाबाट विधेयक पारित भए प्रमाणीकरणका लागि पुन : राष्ट्रपतिकहाँ फेरी जानेछ।

राष्ट्रपति विद्यादेवी भण्डारीले दुवै सदनबाट पारित भएको नागरिकता विधेयक पुनरविचार गर्न भनेर १५ बुँदे सन्देशसहित फिर्ता गरेकी थिइन्।