महान्यायाधीवक्ता खातीलाई अपराधीको संज्ञा, तत्काल पदबाट निलम्बन गर्न माग

काठमाडौं । एमाले सांसद महेश बस्नेतले महान्यायाधिवक्ता खम्बबहादुर खातीलाई तत्काल निलम्बन गर्न सरकार समक्ष माग गरेका छन् । मंगलबार प्रतिनिधिसभामा बैठकमा बोल्ने क्रममा उनले महान्यायाधिवक्ता खातीले पदमा बसेर विवादित ठगी कामहरु गरेको आरोप लगाए । उनले भने–‘नेपाल सरकारको महान्यायाधिवक्ता जस्तो गरिमामय पदमा बसेको र सरकारवादी मुद्दाको वकालत गर्नुपर्ने यस्ता विवादित, यस्ता फटाहा, यस्ता ठग, यस्ता अपराधी व्यक्तिहरु कुनै हालतमा राख्नुहुन्न र तत्काल प्रधानमन्त्रीले खम्बबहादुर खातीजीलाई निलम्बन गर्नका लागि म हार्दिक अनुरोध गर्न चाहन्छु । हार्दिक माग गर्न चाहन्छु ।’

सांसद बस्नेतले भनेजस्तै महान्यायाधीवक्ता खाती धेरै विवादमा परिसकेका छन् । खातीमाथि पदको दुरुपयोग गरी राजस्व अनुसन्धान विभाग लगायतका निकायबाट दर्ता हुने ठूला आर्थिक स्वार्थका मुद्दामा चलखेल गरेको आरोप छ । उनी कर्पोरेट वकिल भएकाले उनले ठूला आर्थिक स्वार्थका मुद्दा दर्ता हु्न नदिने, भइहाले कमजोर बनाउने भूमिका खेलिरहेका छन् । महान्यायाधिवक्ता खाती अनेकौं काण्डमा परिसकेका छन् । नाबालिका बलात्कार मुद्दामा आरोपीलाई सहयोग नगर्दा केही महिनाअसघ उनले ललितपुर सरकारी वकिल कार्यालयकी सरकारी वकिललाई हटाएका थिए । सिमेन्ट उद्योगदेखि बालुवाटारको जग्गा हिनामिनासम्बन्धि मुद्दामा उनी खुलेर आरोपीको पक्षमा उभिएका थिए ।

कुमारी बैंकको ठगी प्रकरणमा पनि खातीले मुद्दा चलाउन रोकेको आरोप छ ।। प्रहरीले प्रशस्त प्रमाणसहित अनुसन्धान गरे पनि महान्यायाधिवक्ता कार्यालयले मुद्दा नचलाउने निर्णय गरेको थियो । 

महान्यायाधीवक्ता नियुक्ति हुनुअघि वकालतभन्दा व्यापारीहरुको मुद्दामा सेटिङ मिलाउने खातीको प्रमुख काम थियो । सेटिङ मिलाउने व्यक्ति आफैं कुर्सीमा पुगेपछि बैंकिङ कसुरमा समेत मुद्दा चलाउन रोकिएको छ । उनले सम्पत्ति शुद्धीकरणका कतिपय मुद्दा विभिन्न बहानामा महिनौंदेखि रोकेका छन् । सम्पत्ति शुद्धिकरणका महानिर्देशक प्रेम भट्टराईलाई दबाब दिएरै उनले मुद्दा दायर गर्नबाट रोक्दैआएका छन् ।