एसपीपी सम्झौता गर्ने कुनै प्रक्रिया अघि बढेको छैनः नेपाली सेना

काठमाडौं । नेपाली सेनाले एसपीपी सम्बन्धी समाचारहरुमा ध्यानाकर्षण भएको जनाएको छ । अमेरिकासँग हुने भनिएको स्टेट पार्टनरसिप प्रोगाम (एसपीपी) सम्झौताबारे संसददेखि सडकसम्म चर्को बिरोध भएपछि आज सत्ता गठबन्धनको बैठक राखिएको थियो । बैठकमा प्रधानमन्त्री शेरबहादुर देउवाले एसपीपी सम्झौता नगर्ने प्रष्ट पारेका छन् । प्रतिनिधिसभामा कानुन, न्याय तथा संसदीय मामिला मन्त्री गोविन्द बन्दीले एसपीपी सम्झौताको बारेमा भ्रम फैलाइएको बताएका थिए ।

एसपीपी सम्झौताबारे नेपाली सेनाले पनि आफ्नो धारणा सार्वजनिक गरेको छ । नेपाली सेनाले बुधबार एक विज्ञप्ति जारी गर्दै विगत लामो समयदेखि नेपाली सेना र अमेरिकी सेनाबीच रहँदै आएको सहयोग र सहकार्य सन्दर्भमा हाल विभिन्न संचारमाध्यमहरुमा चर्चामा आएको एसपीपी सम्बन्धी समाचारहरुमा नेपाली सेनाको ध्यानाकर्षण भएको जनाएको छ ।

एसपीपी सम्बन्धी कुनै पनि सम्झौता वा समझदारी नेपाली सेनाले अमेरिकी सेना वा सरकारसँग नगरेको र त्यस्तो सम्झौता गर्नेतर्फ कुनै प्रक्रियासमेत नभएको स्पष्ट पारेको छ ।

नेपालले अवलम्बन गरेको असंलग्न परराष्ट्र नीति, नेपालको विशिष्ट भू–राजनैतिक अवस्थिति एवं सामरिक संवेदनशीलतामा प्रतिकूल असर गर्ने गरी कुनै पनि सैनिक साझेदारी भविष्यमा कोही कसैसँग पनि गर्न नहुने वस्तुगत यथार्थतामा नेपाली सेना सदैव प्रष्ट र सचेत रहेको व्यहोरा बताएको छ ।