मन्त्री पद थमौती गर्ने झाँक्रीको झेली खेल, सहरी विकासको मन्त्रालयगत छलफलमा बिलम्ब

काठमाडौं । प्रतिनिधिसभाबाट बजेट पारित भएपछि मन्त्रिपरिषद् पुनर्गठन हुने हल्ला चलेपछि शहरी विकास मन्त्री रामकुमारी झाँक्रीले आफ्नो मन्त्रालयको बजेट विनियोजनसम्बन्धी विवरण रोकेकी छन् ।

प्रतिनिधिसभामा पेश गर्नुपर्ने मन्त्रालयगत विनियोजनको विवरण तयारी अवस्थामा छ । तर, मन्त्री झाँक्रीले सचिवलाई अह्राएर उक्त विवरण अहिलेसम्म प्रतिनिधिसभामा पेश गर्न दिएकी छैनन् ।

अरु सबै मन्त्रालयका विनियोजन विवरण संसदमा पुगिसकेको छ । अधिकांश मन्त्रालयबारे छलफल भइसकेको छ । तर, शहरीमा पटक पटक ताकेता गर्दा पनि विवरण पठाइएको छैन । शहरी विकास मन्त्रालयकै कारण संसदीय छलफल प्रभावित भएको संसद सचिवालयका प्रवक्ता डा.रोजनाथ पाण्डे बताउँछन् । ‘उहाँहरुले आफ्नो विवरण समयमै पठाइदिनुभएको भए सोमबारसम्म छलफल टुंगिने थियो, तर हामीले सोधखोज गर्दा पनि अहिलेसम्म विवरण आएको छैन’, डा. पाण्डेले भने । 

झाँक्रीसम्बद्ध दल नेकपा (एकीकृत समाजवादी) ले पूर्वसहमतिअनुसार ६ महिनाको कार्यकाल पूरा गरेका मन्त्रीहरुलाई फिर्ता गराएर नयाँ मन्त्रीको नाम पठाइसकेको छ । 

उक्त पार्टीको सचिवालय बैठकले निर्णय गरेर नयाँ मन्त्रीहरुको नाम पठाएपछि प्रधानमन्त्री शेरबहादुर देउवाले ‘केही दिनका लागि’ भन्दै मन्त्रिपरिषद् हेरफेर रोक्नुभएको थियो ।
पार्टी अध्यक्ष माधवकुमार नेपालले आफ्ना सहकर्मीहरुलाई बताएअनुसार, मन्त्रीहरुको हेरफेर गर्ने आफ्नो पार्टीको निर्णयपछि अन्य दलमा भुइँचालो गएका कारण प्रधानमन्त्रीले कम्तीमा बजेट पारित हुने दिनसम्मका लागि विस्तार कार्य रोक्नुभएको हो ।

६ महिनाको सहमतिमा मन्त्री भएका एकीकृत समाजवादीका मन्त्रीहरुले थप दुई महिना गरी आठ महिनाको कार्यकाल गुजारिसकेका छन् ।

पार्टीले फिर्ता बोलाउने निर्णय गरेपछि स्वास्थ्य मन्त्री विरोध खतिवडा र शहरी विकास मन्त्री झाँक्रीले पार्टी निर्णयप्रति असन्तुष्टी व्यक्त गर्दै आएका छन् । बाँकी मन्त्री भने पार्टी निर्णय मान्न तयार छन् । पार्टी निर्णय मान्न तयार नहुनेमध्ये झाँक्री सबभन्दा बढी असन्तुष्ट भएकी छन् ।

उनले आफ्नो मन्त्री पदलाई केही दिन भए पनि थम्थम्याउनका लागि संसदमा पठाइनुपर्ने विवरण पठाउन ढिला गरेको मन्त्रालय स्रोतले जनाएको छ ।