प्रधानमन्त्री ओलीको विकल्प खोज्ने समय अहिले हो ?

काठमाडौं । नेपाल कम्युनिष्ट पार्टीभित्र प्रधानमन्त्री केपी शर्मा ओलीलाई चक्रब्यूहमा पार्ने खेल भइरहेको छ । लिम्पियाधुरा, लिपुलेक र कालापानी समेटेर नक्सा जारी गर्नेदेखि वैवाहिक अंगीकृत नागरिकताको सवालमा प्रधानमन्त्री ओलीले जुन निर्णय क्षमता प्रदर्शन गरे, त्यसबाट विशेषगरी भारत उनीसँग चिढिएको छ । यस्तो बेला राष्ट्रका सबै शक्तिहरु एकजुट भएर सरकारलाई साथ दिनुपर्ने बेलामा नेकपाको स्थायी समिति बैठकमा उनलाई राजीनामा दिन बाध्य पार्ने गरी पार्टीका अर्का अध्यक्ष पुष्पकमल दाहाल ‘प्रचण्ड’, उपाध्यक्ष वामदेव गौतम, बरिष्ठ नेता माधवकुमार नेपाल र झलनाथ खनालसहितको मोर्चाबन्दी भएको छ ।

मोर्चाबन्दी गर्ने बेला यो होइन । कमसेकम ६ महिना वर्तमान सरकारको विकल्प नेकपाभित्र नसोचे राष्ट्रिय एकता बलियो भएको सन्देश जान सक्थ्यो । २०७७ जेठ ३१ मा सिंगो संसदले अतिक्रमणमा परेको नेपाली भूमि समेटिएको नक्सा पारित गरेको १५ दिन नबित्दै प्रधानमन्त्रीलाई राजीनामा दिन बाध्य बनाउँदा त्यसले के सन्देश दिन्छ ? नेकपाका नेताहरुले गम्भीरतापूर्वक लिनुपर्छ जस्तो लाग्छ । ओली नेतृत्वको सरकारले नेपालको भूमि लिम्पियाधुरा, लिपुलेक र कालापानी समेटेर नक्सा जारी गरेको थियो, भारतले प्रधानमन्त्रीबाटै हटाइदियो भन्ने ठाउँ दिन खोजिएको त होइन ? अहिले ओलीलाई हटाउँदा भारतले नै हटायो भन्ने सन्देश जान्छ । भारतले नै त्यस्तो अफवाह फैलाउँछ ।

नक्सा जारी हुने अघिल्लो दिन कोरोना नियन्त्रणका लागि १० अर्ब रुपैयाँ खर्च भएको र त्यो अति नै भएको भन्दै सुकिलामुकिलाहरुको जुुलुस निस्कदा भारतीय मिडियाले ‘भारती भूमि कालापानीका नक्सा जारी गर्ने ओलीका हवा निकलगई’ भनेर दुस्प्रचार गरेका थिए । अहिले नेकपाले ओलीलाई प्रधानमन्त्रीबाट हटाउँदा भारतीय मिडियाले यस्तो लेख्नेछन्–नक्सा जारी गर्ने र भारतीय चेलीलाई विवाह गरेको ७ बर्षपछि मात्रै अंगीकृत नागरिकता दिने निर्णय गर्ने प्रधानमन्त्रीलाई भारतले हटाइदियो । नेकपाका नेतागणहरु, के हामी हाम्रो प्रधानमन्त्री भारतले हटायो भन्ने ठाउँ दिन त खोजिरहेका छैनौं । विगतमा लैनचौर दूताबासको निर्देशनमा जसरी नेपालको राजनीति घुम्थ्यो, त्यही पुनराबृत्ति गराउनेतिर गइरहेका त छैंनौं ?

प्रधानमन्त्री ओलीका पनि गल्तीकमजोरी होलान्, उनले मन्त्रिपण्डल गठनदेखि नियुक्तिहरु एक्लौटी गर्दैआएका छन् । पूर्वमाओवादी केन्द्रका मन्त्रीका मन्त्रालयहरुका नियुक्तिमा पनि हस्तक्षेप गरेका होलान् । नक्सा जारी गर्नेदेखि वैवाहिक अंगकिृत नागरिकताका सवालमा सिंगो पार्टीकै योगदान हो तर उनले आफूले मात्र गरेको भने होलान् । प्रधानमन्त्री भएर आफ्नो गुटलाई मात्र च्यापेका होलान् तर यति हुँदाहुँदै पनि प्रधानमन्त्री वा पार्टी अध्यक्ष ओलीको विकल्प खोज्ने बेला अहिले होइन । अहिलेको अवस्थामा सरकारले पार्टीको निर्देशन पालना गर्नुपर्ने, मन्त्रिमण्डल पुनगर्ठन गर्ने र सरकारलाई चुस्त बनाउने, नियुक्तिहरुमा पनि पार्टीको सिफारिस कार्यान्वयन गर्ने परिस्थिति निर्माण गर्नेतर्फ नेकपाका शीर्षनेताहरु लाग्नुपर्ने हो । तर बिडम्बना नेकपाका नेताहरु ओलीलाई हटाउने एकसूत्रीय अभियानमा देखिएका छन् । स्थायी समिति बैठकमा नेताहरुको सुरुवाती प्रस्तुतिले त्यही देखाएको छ ।