कांग्रेस राष्ट्रिय सभा सचेतक अनिता देवकोटा केन्द्रीय सदस्यमा पराजित

काठमाडौं ।  कांग्रेसको १४ औँ महाधिवेशनअन्तर्गत महिला खुला केन्द्रीय सदस्यमा राष्ट्रिय सभामा कांग्रेसकी सचेतक समेत रहेकी सांसद अनिता देवकोटा पराजित भएकी छन् । 

सोमबार राति सकिएको मतगणना अनुसार उनी खुला केन्द्रीय सदस्यमा पराजित भएकी हुन् । उनले १० औं स्थानको मत पाएकी थिइन् । महिला खुला केन्द्रीय सदस्यमा ९ जना विजयी हुने विधानमा व्यवस्था छ । 

९ औं नम्बरमा अटाएकी रंगमती शाहीले १७८९ मत पाएकी थिइन् । महिला खुला केन्द्रीय सदस्यमा ९ पदका लागि ३० जना चुनावी मैदानमा थिए । 

महिला खुला केन्द्रीय सदस्यमा सभापति शेरबहादुर देउवा पक्षले वर्चश्व कायम गरेको छ । खुला केन्द्रीय सदस्य ९ जना मध्ये एक जना मात्र शेखर कोइराला पक्षले जितेको छ । बाँकी ८ वटा पदमा देउवा पक्षले जितेको छ ।

महिलातर्फ खुला केन्द्रीय सदस्यमा डिला संग्रौलाले सबैभन्दा धेरै मत पाएकी छन् । उनले दुई हजार ८८५ मत पाएकी हुन् । 

दोस्रो स्थानमा पुष्पा भुसाल रहेकी छन् । भुसालले दुई हजार ७१८ मत पाइन् ।  प्रधानमन्त्रीसमेत रहेकी सभापति शेरबहादुर देउवा पत्नी आरजु राणाले दुई हजार ५३६ मत पाउँदा चौथो बनेकी अम्बिका बस्नेतले दुई हजार ३३९, इश्वरी न्यौपानेले दुई हजार २५९, सरिता प्रसाईंले दुई हजार ९६, रमा कोइराला पौडेलले एक हजार ८५८, सुशीला ढकाल आचार्यले एक हजार ८०४ र रंगमती शाहीले एक हजार ७८९ मतसहित विजयी भएका छन् । 

निर्वाचितमध्ये प्रसाईंबाहेक सबै शेरबहादुर देउवा प्यानलका हुन् ।  न्युज कारखाना