ओलीलाई सर्वसम्मत चयन गर्ने कसरत- भीम रावलको पर्चा बाँड्नेहरुलाई मूल गेट बाहिर निकालियाे

चितवन । नेकपा एमालेको १० औं राष्ट्रिय महाधिवेशनमा अध्यक्षमा उम्मेदवारी घोषणा गरेका भीम रावलका कार्यकर्ताहरुलाई एमाले स्वयंसेवकहरुले मूल गेट बाहिर पठाइदिएका छन् ।

प्रतिनिधिहरूलाई भीम रावलको पर्चा वितरण गरिरहेकाे समयका रावल पक्षका कार्यकर्ताहरुलाई यहाँ पर्चा बाँड्न पाइँदैन भन्दै स्वयंसेवकहरुले बाहिर पठाइदिएका हुन्

बन्दसत्रको हलभित्र प्रवेश गर्न लामबद्ध भएकाहरुलाई रावलका कार्यकर्ताहरुले मेरो उम्मेदवारी किन’ लेखिएको भीम रावलको पर्चा वितरण गरेका थिए । पर्चामा रावलले अध्यक्षमा उम्मेदवारी दिनुपर्नाका कारणबारे उल्लेख छ ।

पर्चा हातमा लिइसकेका प्रतिनिधिहरूलाई पनि स्वयंसेवकहरुले बाहिर ननिकाल्न र खल्ती वा झोलामा राख्न आग्रह गर्दै हलभित्र छिराएका छन् ।

आजको बन्दसत्रले केपी शर्मा ओलीलाई सर्वसम्मत अध्यक्ष चयन गर्ने तयारी छ । तर रावलले पनि अध्यक्षमा उम्मेदवारी घोषणा गरेका छन् ।