ठूलो समूहसहित रामचन्द्र झा नेकपा समाजवादीमा, माधव नेपालले गरे स्वागत

जनकपुरधाम । नेकपा (एकीकृत समाजवादी) पार्टीमा प्रवेशको लहर नै चलेको छ । आजमात्रै प्रभावशाली वामनेता रामचन्द्र झा नेकपा समाजवादीमा प्रवेश गरेका छन् ।

जनकपुरको विदेह नगरपालिकाको तीनकोरिया चोकमा आयोजित कार्यक्रममा झको नेतृत्वमा विभिन्न दल परित्याग गरी ४ सय जना नेकपा समाजवादीमा प्रवेश गरेका छन् । झालाई नेकपा समाजवादीका अध्यक्ष माधव नेपालले टीका लगाएर स्वागत गरेका थिए । पंचायतकालमा भूमिगत भएर राजनीति गर्दा सेल्टर लिएको विदेश नगरपालिकामै अध्यक्ष नेपालले झालाई पार्टी प्रवेश गराएका छन् । झा यसअघि नेकपा माओवादी केन्द्रमा थिए । माओवादी भन्दा अघि उनी एमालेमै थिए । एमालेबाट उनी स्थानीय विकास मन्त्री समेत भएका थिए ।  

पार्टी प्रवेश कार्यक्रममा नेकपा समाजवादीका अध्यक्ष माधवकुमार नेपालले सर्वोच्च अदालतको विवाद समाधानका लागि प्रधानमन्त्री शेरबहादुर देउवासँग छलफल भएको बताएका छन् । न्यायपालिकाको समस्यालाई छिटोभन्दा छिटो समाधान गर्न आवश्यक रहेको उनको भनाइ थियो ।

जनकपुरधाम विमानस्थलमा सञ्चारकर्मीसँग कुरा गर्दै अध्यक्ष नेपालले न्यायालयको विवाद चाँडो समाधान नहुँदा बाहिर नकारात्मक सन्देश गएको बताए । वार्ता र संवादकै माध्यमबाट न्यायपालिकाको विवाद समाधान हुने उनको भनाइ थियो ।