माओवादीसँग एकताको चर्चा चलिरहेका बेला प्रचण्डलाई भेटे विप्लवले, एकताको सम्भावना कति ?

काठमाडौं । नेकपा (माओवादी केन्द्र)सँग एकीकरणको चर्चा चलिरहेका बेला नेपाल कम्युनिष्ट पार्टीका महासचिव नेचविक्रम चन्द ‘विप्लव’ले माओवादी अध्यक्ष पुष्पकमल दाहाल ‘प्रचण्ड’सँग भेट गरेका छन्।

विप्लव शनिबार बिहान खुमलटारमा गएर प्रचण्डसँग भेटघाट गरेको सचिवालयले जनाएको छ। भेटमा उनीहरुबीच दुई पार्टीबीच सहकार्यका विषयमा छलफल भएको सचिवालयको भनाइ छ।

पछिल्लो समय माओवादी केन्द्र र विप्लव नेतृत्वको नेकपाबीच पार्टी एकताको हल्ला चलिरहेको बेला उनीहरुबीचको भेटलाई थप अर्थपूर्ण रुपमा हेरिएको छ।

भेटमा माओवादी केन्द्रका नेता कृष्णबहादुर महरासहित अध्यक्ष प्रचण्ड र विप्लवबीच छलफल भएको स्रोतले जानकारी दियो। स्रोतका अनुसार छलफलमा दुई पार्टीबीच सहकार्य गरेर जान सकिने बताइएको छ।