सरकारी कागजात किर्ते गरेको अभियोगमा फरार रहेकी सांसद मुख्यमन्त्री आचार्यलाई भोट हाल्न आउने चर्चापछि प्रहरी ‘अलर्ट’

काठमाडाैं । सरकारी कागजात किर्ते गरेको अभियोगमा अदालतबाट दोषी ठहर भएपछि ‘फरार’ भएकी नेकपा एमालेकी सांसद गुलेफुन खातुन मियाँ प्रदेश नम्बर १ का मुख्यमन्त्री भीम आचार्यलाई विश्वासको मत दिन आउने चर्चा छ ।

आज मुख्यमन्त्री आचार्यले प्रदेश सभामा विश्वासको मत लिने तयारी गरेसँगै खातुन मियाँ आचार्यलाई विश्वासको मत दिन आउने चर्चा चलेपछि प्रहरी ‘अलर्ट’ बनेको छ ।

मोरङ प्रहरी प्रमुख एसपी जनार्दन जिसीका अनुसार उनी लामो समयदेखि प्रदेश सभाको बैठकमा उपस्थित छैनन् ।

जिसीले भने,‘उहाँ लामो समयदेखि प्रदेश सभाको बैठकमा आउनु भएको छैन,‘उहाँबारे हामी अलर्ट छौँ ।’ 

फरार सांसद भेटे के गर्नुहुन्छ? भन्ने प्रश्नमा उनले थपे, ‘यसै गर्छौ भनेर अहिले भन्न मिल्दैन। तर प्रहरीले आफ्नो सुर छोड्दैन।’

मोरङबाट समानुपातिक सांसद बनेकी खातुनलाई सरकारी छाप र हस्ताक्षर किर्ते गरेको मुद्दामा उच्च अदालत विराटनगरले एक वर्ष कैद र १४ हजार ५८३ जरिमाना सजायको फैसला सुनाएकाे थियाे । त्येसपछि उफरार रहेकी उनी प्रहरीको खोजी सूचीमा छन्।